नेकपा (एमाले) केन्द्रीय सदस्य अरबिन्द सिंहले दुईदुई पटक प्रतिनिधि सभा विघटन गर्ने एमालेले अहिले पुनःस्थापनाको मुद्दा उठाउने नैतिक तागत नरहेको बताएका छन्। शुक्रबार केन्द्रीय कमिटी बैठकमा धारणा राख्दै सिंहले चुनाव बहिष्कार गर्ने नीति अर्को भिडन्त निम्त्याउने योजना रहेको बताएका हुन्।
‘दुई-दुई पटक हामी आफैले संसद विघटन गरेकाले संसद पुनःस्थापनाको माग लिएर आन्दोलनमा जाँदा हामी आम जनताकाबीच घृणा र हाँसोको पात्र मात्रै हुन्छौं। चुनाव बहिष्कार गर्ने नीति अर्को भिडन्त निम्त्याउने योजना हो। कमजोरी सच्याउँदै चुनावमा जानुको विकल्प छैन,’ उनले बैठकमा भने।
दोस्रो विधान महाधिवेशनले पारित गरेको राजनीतिक कार्यदिशा ‘जस्तोसुकै चुनौतीको सामना गर्ने रेजिलिएन्ट दृढ अवस्थामा हामी रहेको’ विश्लेषण २४ घन्टा नपुग्दै फेल भएको सिंहले बताए। फेल भएको कार्यनीति बोकेर आगामी पाँच वर्ष कसरी जाने? भन्दै प्रश्न पनि गरे।
‘भदौ २२ गतेको जस्तोसुकै चुनौतीको सामना गर्ने रेजिलिएन्ट दृढ अवस्थामा हामी रहेको राजनीतिक प्रतिवेदनको विश्लेषण २४ घन्टा नपुग्दै फेल भयो। फेल भएको कार्यनीति बोकेर आगामी पाँच वर्ष कसरी जाने होला? हाम्रा विश्लेषणहरू वस्तुपरक हुने गरेका छैनन्। नेतृत्वले के सुन्न रुचाउँछन् त्यही मात्रै सुनाउने प्रवृत्तिले हामीलाई सच्याउँदैन। सक्किने बाटोमा लैजान्छ,’ सिंहले भने।
पार्टी सत्ता र राज्य सत्ता एमालेको हातमै भएका बेला भदौ २३ गते भएको नरसंहारको आरोपबाट सतही विश्लेषणका आधारमा एमालेले आजीवन उन्मुक्ति नपाउने पनि बताए।
‘२४ गतेको विध्वंश २३ गतेको नरसंहारको प्रतिक्रिया हो। जसमा घुसपैठ भयो। जुन घटनालाई विदेशी षड्यन्त्रको सिद्धान्त जस्ता अमूर्त कुरा मात्रै भनेर आफ्नो अकर्मण्यता ढाकछोप गर्दा त्यो समीक्षा फेरि सतही हुन्छ। विस्तृत र वस्तुनिष्ठ विश्लेषण जरुरी छ,’ उनले भने।
भ्रष्टाचार र व्यभिचारका डेढ दर्जन भन्दा बढी आरोपहरूमा आरोपितहरु केन्द्रीय कमिटीमा रहेको भन्दै त्यसको छानबिन गरेर कारबाही गर्ने बारेमा पार्टीले संस्थागत ढंगले कहिले बोल्ने कि बोल्दै नबोल्ने? भन्दै उनले प्रश्न गरे। उनले वर्तमान अवस्थामा पार्टीमाथि भन्दा पनि अध्यक्ष ओली र उनका अभिव्यक्तिमाथि नागरिकको आक्रोश रहेको बताए।
‘वर्तमान अवस्थामा जनताको आक्रोश नेकपा एमालेमाथि भन्दा पनि पार्टी अध्यक्ष, उनका अभिव्यक्ति र उनलाई घेराबन्दीमा राखेर चलाउने समूहमाथी रहेकोले त्यो यथार्थलाई आत्मसात गर्दै जिम्मेवारी हस्तान्तरण गरेर मार्ग प्रशस्त गर्नु नै पार्टीको भविष्य बचाउने एक मात्रै उपाय हो,’ उनले भने।
उनले युवा विद्यार्थी र आम जनता स्वःस्फूर्तरुपमा सरकारका विरुद्धमा सडकमा आउनु के प्रतिक्रान्ती हो? भन्दै पनि प्रश्न गरे।
‘कुशासन र भ्रष्टाचारको विरुद्ध गरिने सडक संघर्षहरूका कारण सत्ताच्युत हुने कुरालाई प्रतिगमन भन्न मिल्छ? यसमा अझै वस्तुपरक ढंगले विश्लेषण गर्न जरुरी छ,’ उनले भने।
उनले पार्टीका विद्यार्थी संगठन अनेरास्ववियुका अध्यक्ष डा. सुजन कडरियाले राजीनामा दिएकोबारे पनि प्रश्न गरे। उनले फेरि त्यही नेतृत्व स्थापित गर्न खोजिएको पनि बताए।
‘जनसंगठनहरु कसरी चल्दैछन् भन्ने एउटा उदाहरण– टंक कार्कीदेखि समिक बडालपछिका पुस्तालेसमेत गर्व गर्ने संगठन अनेरास्ववियुको अध्यक्षमा एक दिन टिक्न नसकेर राजीनामा दिएर भाग्ने नेतृत्वलाई स्थापित गर्ने कस्तो कार्यशैलीमा पुगेका छौं हामी?,’ उनको प्रश्न थियो।
चार वर्षसम्ममा केन्द्रीय कमिटीका बैठकमा चार–पाँच जना बाहेक तीन मिनेटसमेत बोल्न नपाउँदा पदाधिकारीलाई कुनै हिनताबोध र ग्लानी नभएको भन्दै प्रश्न गरे।
‘तपाईं पदाधिकारीहरूले सार्वजनिक खपतका लागि बाहिर बोल्नुको कुनै अर्थ छैन,’ उनले भने।
उनले पूर्वराष्ट्रपति विद्या भण्डारीको सदस्यता नवीकरण गरी पार्टी काममा फर्किने वातावरण बनाउन माग पनि गरेका थिए।
1635339834.jpeg)
-1746009348.jpg)
