गृहमन्त्री ओमप्रकाश अर्यालले भदौ जेनजी आन्दोलन क्रममा भदौ २३ र २४ गते भएको प्रदर्शनबाट नेपाल प्रहरीलाई ठूलो क्षति पुगेको बताएका छन्।
प्रहरी दिवसका अवसरमा आयोजित कार्यक्रममा बोल्दै गृहमन्त्री अर्यालले फ्रन्टलाइनमा खटिने भएकाले जस्तोसुकै घटनामा पनि सुरूमा प्रहरी नै निशानामा पर्ने गरेको बताएका हुन्।
'समाजका हरेक घटनामा प्रहरीले नै फस्र्ट रेस्पोण्डरको रुपमा काम गर्ने र कानून कार्यान्वयनमा प्रहरी नै अग्र पंक्तिमा रहने कारणले प्रहरीको काम कारबाहीको सम्बन्धमा मात्रै नभई सरकारप्रतिको धारणा र सोको प्रतिक्रियामा समेत प्रहरी निशानामा पर्ने गर्दछ। यही भाद्र २३ र २४ गतेको विरोध प्रदर्शन र आन्दोलन यसैको प्रतिविम्ब हो,' उनले भने।
उनले न्युन साधन, श्रोतबाट कार्य सम्पादन गर्दै आइरहेको नेपाल प्रहरीलाई जेनजी आन्दोलनले ठूलो क्षति पुर्याएको पनि बताए।
'जसमा नेपाल प्रहरीका होनहार तीन जना प्रहरी कर्मचारीले जीवन उत्सर्ग गर्नुभएको छ । साथै प्रहरीका सांगठनिकदेखि व्यक्तिगत सामानहरु पनि लुटपाट र आगजनी भएका छन् । त्यसैत अभाव झन त्यसमा पनि यस किसिमको क्षतिले नेपाल प्रहरीलाई मात्रै होइन, आम नागरिकको जीवनमा पनि प्रभाव पारेको छ । न्युन साधन, श्रोतबाट कार्य सम्पादन गर्दै आइरहेको नेपाल प्रहरीलाई यस आन्दोलनले निकै ठूलो क्षति पुर्याएको छ,' उनले भने।
उनले प्रहरीलाई साधन, स्रोतयुक्त बनाउन गृह मन्त्रालयले गम्भीरताका साथ पहल गर्ने बताए। उनले सरकारले प्रहरीलाई स्रोत, साधन उपलब्ध गराउन तत्काल आवश्यक कदम अघि बढाउने बताए।
आगामी फागुन २१ गते प्रतिनिधि सभाको निर्वाचन गराउनुपर्ने दायित्व भएकाले पनि प्रहरीलाई स्रोत साधन उपलब्ध गराउन आवश्यक प्रक्रिया अगाडि बढाउने उनले बताए।
'शान्ति सुरक्षाको लागि महत्वपूर्ण जिम्मेवारी लिएको नेपाल प्रहरी संगठनलाई पर्याप्त श्रोत, साधन उपलब्ध नभएमा कार्य सम्पादन प्रभावित हुनेमा गृह मन्त्रालयर वर्तमान सरकार सचेत रहेको छ । प्रहरीलाई साधन, श्रोतयुक्त बनाउन गृह मन्त्रालयले गम्भीरताका साथ पहल गर्नेछ र नेपाल सरकारले यसका लागि तत्काल आवश्यक कदम अघि बढाउनेछ भन्ने विश्वास समेत दिलाउन चाहन्छु,’ उनले भने।
गृहमन्त्री अर्यालले बढ्दो प्रविधिसँगै नयाँ प्रकृतिका अपराधका गतिविधि मौलाएको बताए।
यसले अपराध अनुसन्धान कार्य थप चुनौतिपूर्ण बन्दै गएको बताउँदै नेपाल प्रहरीलाई साधन, श्रोतले सुसज्जित बनाइ देश र नागरिक सुरक्षा सुदृढ बनाउनु गृह मन्त्रालयको प्रमुख प्राथमिकतामा रहेको बताए ।—न्युज एजेन्सी नेपाल
-1760680909.jpeg)
1635339834.jpeg)
-1746009348.jpg)
