नेपाली कांग्रेस गण्डकी प्रदेशका सभापति शुक्रराज शर्माले फागुन २१ को चुनाव वैशाखमा सार्नुपर्ने धारणा राखेका छन्।
शुक्रबार सानेपामा बसेको केन्द्रीय कार्यसमिति बैठकमा धारणा राख्दै प्रदेश सभापति शर्माले सरकारले प्रतिनिधि सभा निर्वाचन फागुन २१ गतेका लागि तोके पनि पहाडी र हिमाली जिल्लामा त्यसबेला चुनाव गराउन गाह्रो हुने बताए।
‘फागुन २१ को चुनावलाई वैशाख मसान्तमा सार्नुपर्छ, वैशाखमा चुनाव गर्दा शान्ति सुरक्षाको वातावरण पनि निर्वाचन अनुकूल बनाउन सरकारले समय पाउनेछ,’ उनले भने।
कार्यवाहक सभापति पूर्णबहादुर खड्काको अध्यक्षतामा बिहीबारदेखि केन्द्रीय कार्यसमिति बैठक सुरू भएको थियो।
शुक्रबार पनि केन्द्रीय समितिमा नेताहरूले धारणा राखिरहेका छन्।
जेनजी प्रदर्शन र विकसित राजनीतिक घटनाक्रम सम्बन्धमा, प्रतिनिधिसभा विघटन र घोषित फागुन २१ को निर्वाचन सम्बन्धमा, मुलुकको शान्ति सुरक्षा एवं सुशासनको अवस्था सम्बन्धमा, प्राकृतिक विपद र क्षतिपूर्ति तथा पुनः निर्माण सम्बन्धमा, २०८२ भदौ २३ र २४ गते भएका जनधनको क्षति तथा समग्र घटनाहरुका सम्बन्धमा, राष्ट्रपति भवन, प्रधानमन्त्री निवास, सिंहदरबार, संसद भवन, सर्वोच्च अदालत, प्रदेश सभा भवन, सुरक्षा निकायका कार्यालयदेखि पालिका र वडा कार्यालयदेखि सार्वजनिक एवं निजी सम्पत्ति तोडफोड र आगजनीबाट भग्नावशेष भएका केन्द्रीय कार्यालय लगायतका नेपाली कांग्रेसका मुलुकभरका विभिन्न कार्यालयहरूको पुनः निर्माण सम्बन्धमा छलफल गर्ने केन्द्रीय समितिको एजेन्डा छ।
यही एजेन्डाको वरपर रहेर केन्द्रीय सदस्यहरूले धारणा राखेका छन्।
साथै पार्टी सभापति, केन्द्रीय सदस्य आरजु राणा देउवालगायत नेताहरूमाथि भएको भौतिक आक्रमण, उनीहरूको निजी सम्पत्तिमाथि भएको तोडफोड, लुटपाट र आगजनी, अन्य राजनीतिक दलका नेता र उनीहरूको सम्पत्तिमाथि आक्रमण, तोडफोड र आगजनी, उद्योगी, व्यापारी एवं व्यवसायिक प्रतिष्ठान तथा अन्य व्यक्तिका निजी सम्पत्तिमाथि भएको तोडफोड, लुटपाट र आगजनी, कार्यसम्पादन समितिको निर्णय सम्बन्धमा, विधानले तोकेको समयावधिभित्र नै पार्टीको १५ औं महाधिवेशन गर्नका लागि कार्यतालिका निर्माण गर्ने सम्बन्धमा, क्रियाशील सदस्यता सम्बन्धमा, अनुशासन समितिको निर्णयका सम्बन्धमा, केन्द्रीय निर्वाचन समितिको सम्बन्धमालगायत एजेन्डामा छलफल भइरहेको छ।
1635339834.jpeg)
-1746009348.jpg)
