नेपाली कांग्रेसका महामन्त्री गगन थापाले पार्टीको १५ औं महाधिवेशन कार्यतालिका पेस गरेका छन्।
महामन्त्री थापाले केन्द्रीय कार्यसम्पादन समितिमा महाधिवेशन २०८२ मंसिर २७ देखि २९ गतेसम्म गर्ने गरी प्रस्ताव गरेका हुन्।
यो प्रस्ताव केन्द्रीय कार्यसमितिमा पुगेर निर्णय भएर आउन केही दिन लाग्ने देखिन्छ।
२८ असोजबाट जारी केन्द्रीय समिति बैठकमा भने महामन्त्री थापाको प्रस्ताव पेस हुन सकेको छैन।
संस्थापन पक्षीय नेताहरू मंसिरमा महाधिवेशनको पक्षमा नदेखिँदा महामन्त्री थापाको विकल्प सहितको कार्यतालिका केन्द्रीय समितिमा पेस हुन नसकेको हो।
कार्यवाहक सभापति पूर्णबहादुर खड्काको अध्यक्षतामा कांग्रेस केन्द्रीय कार्यसमिति बैठक बसिरहेको छ भने नेताहरूले धारणा राखिरहेका छन्।
सम्भवत: केन्द्रीय समिति बैठक छठपछिसम्म बस्नेछ।
महामन्त्री थापाले पेस गरेको कार्यतालिकामा क्रियाशील सदस्यता नवीकरण र नयाँ वितरणको इन्ट्री कात्तिक २१ भित्र सक्ने भनिएको छ भने कात्तिक मसान्तसम्म क्रियाशील र नयाँ सदस्यता टुंग्याउने उल्लेख छ।
मंसिर ७ गतेसम्म क्रियाशील सदस्यताको नामावली केन्द्रमा बुझाइसक्नुपर्ने, वडा अधिवेशन मंसिर १२ र १३ गतेभित्र सक्नुपर्ने, प्रतिनिधि सभा क्षेत्रीय अधिवेशन र महाधिवेशन प्रतिनिधि टुंगो मंसिर २१ भित्र गरिसक्नुपर्ने कार्यतालिकामा प्रस्ताव गरिएको छ।
मंसिर २७ देखि २९ गतेसम्म केन्द्रीय महाधिवेशन गर्ने प्रस्ताव छ। उनले प्रस्ताव १, २ र विभिन्न प्रस्ताव भनेर कार्यतालिका प्रस्तावित गरेका छन् र केही परिमार्जन गर्न सकिने भनेका छन्। केही कठिनाइ परेका खण्डमा पुसको पहिलो हस्तासम्म नियमित महाधिवेशन गर्ने गरी कार्यतालिका ल्याउन सकिनेमा महामन्त्री थापा छन्।
महामन्त्री थापाले मंसिरभित्रै नियमित महाधिवेशन नभए विशेष महाधिवेशन हुने बताइरहेका छन्।
यो पनि:
कार्यवाहक सभापति खड्काको चुनौती- समयमै नियमित महाधिवेशन नगरे स्वत: विशेष महाधिवेशन ‘एक्टिभेट’
कांग्रेसको १४ औं महाधिवेशन २०७८ मंसिर २४ देखि २८ गतेसम्म काठमाडौंमा भएको थियो।
महामन्त्री थापा र अर्का महामन्त्री विश्वप्रकाश शर्माले मंसिरभित्रै नियमित महाधिवेशन गर्नुपर्ने अडान राखेका छन् भने नेता शेखर कोइराला पनि मंसिरभित्र १५ औं महाधिवेशन गर्नुपर्ने पक्षमा छन्।
तर सभापति शेरबहादुर देउवा पक्षका नेताहरू तयारीका हिसाबले मंसिरमा महाधिवेशन गर्न नसकिने बताउँदै आएका छन्।
यस्तो छ कार्यतालिका;
1635339834.jpeg)
-1746009348.jpg)
