प्रधानमन्त्री सुशीला कार्कीले वर्तमान सरकारको प्रमुख प्राथमिकता तोकिएको समयमा निर्वाचन सम्पन्न गराउनु रहेको बताएकी छन्।
शुक्रबार अपराह्न सिंहदरबारमा नेपालस्थित विभिन्न देशका राजदूत तथा कूटनीतिक नियोग प्रमुखहरूसँग पहिलो पटक सामूहिक भेट गरी उनले आफू नेतृत्वको अन्तरिम सरकारको कामको प्राथमिकताबारे ब्रिफिङ गरेकी हुन्।
परराष्ट्र मन्त्रीको समेत कार्यभार सम्हालिरहेकी प्रधानमन्त्री कार्कीले नेपालको विदेश सम्बन्ध र त्यसका नीतिका बारेमा पनि आफ्नो धारणा राखेको परराष्ट्र मन्त्रालयका प्रवक्ता लोकबहादुर पौडेल क्षेत्रीले जानकारी दिए। त्यस अवसरमा प्रधानमन्त्री कार्कीले निर्वाचनमा सहयोगको अपेक्षा गरिएको पनि बताएकी थिइन्।
उनले निर्वाचनमा अन्तर्राष्ट्रिय पर्यवेक्षक परिचालन र विदेशमा रहेका सबै नेपालीहरूलाई पनि मतदानमा सहभागी गराउने विषयमा पनि छलफल भइरहेको बताएकी थिइन्।
फागुन २१ गतेको निर्वाचनमा विदेशमा रहेका सबै नेपाली नागरिकलाई मतदानमा भाग लिन लगाउने विषयमा पनि आफूले छलफल गरिरहेको कुरा पनि प्रधानमन्त्री कार्कीले राजदूतहरूसँग गरेको परराष्ट्र मन्त्रालयले जनाएको छ।
प्रवक्ता क्षेत्रीले भने, ‘यो डिप्लोमेटिक ब्रिफिङ कार्यक्रम हो। यसमा मूलत उहाँले यो सरकारको प्रमुख प्राथमिकता भनेको चुनाव हो। र चुनावको साथसाथै अन्य प्राथमिकताहरू सरकारले तयार गरेको छ। त्यसको बारेमा जानकारी गराउनु भयो। अर्को कुरा विदेश सम्बन्ध र परराष्ट्र नीतिका विषयमा पनि उहाँले केही जानकारी गराउनु भयो। र यो पहिलो ब्रिफिङ हो। एक किसिमले परराष्ट्र मन्त्रीको हैसियतले उहाँले यो ब्रिफिङ गर्नुभएको हो। चुनावको विषयमा यहाँहरुलाई थाहा नै छ।’
उनले अगाडि भने, ‘चुनाव महत्वपूर्ण प्राथमिकता भएको हुनाले चुनावसँग सम्बन्धित मूलतः ३ वटा विषयहरू एउटा सहयोग, सद्भावको विषय। दोस्रो यो चुनावमा जुन विदेशी पर्यवेक्षकहरू मोबिलाइज गर्ने कुरा हुन्छ। त्यो विषयमा पनि कुरा भयो। र तेस्रो सम्भावनाको हिसाबले विदेशमा रहेका नेपालीहरूलाई पनि यो चुनावमा सहभागी गराउन सकिने विषयमा सम्भावना अध्ययन भइरहेको विषयमा पनि उहाँले जानकारी गराउनु भयो।’
प्रधानमन्त्री कार्कीसँगको भेटमा नेपालस्थित विभिन्न देशका राजदूत र कूटनीतिक नियोगका प्रतिनिधिहरू सहभागी भएका थिए। —न्युज एजेन्सी नेपाल
1635339834.jpeg)
-1746009348.jpg)
