भारतले अब रूसबाट तेल नकिन्ने अमेरिकी राष्ट्रपति डोनाल्ड ट्रम्पको दाबी भारतले अस्वीकार गरेको छ।
बुधबार ह्वाइट हाउसमा पत्रकारहरूसँग कुराकानी गर्दा ट्रम्पले भारतका प्रधानमन्त्री नरेन्द्र मोदीले रूसबाट तेल नकिन्ने आश्वासन दिएको बताएका थिए।
'अबदेखि भारतले रूसबाट तेल किन्दैन। मेरा साथी मोदीले रूसी तेल अब भारतले किन्दैन भन्ने कुराको सुनिश्चितता मसँगको कुराकानीमा गर्नुभएको छ,' ट्रम्पले पत्रकारहरूसँग भनेका थिए।
तर बिहीबारको साप्ताहिक मिडिया ब्रिफिङका क्रममा भारतको विदेश मन्त्रालयका प्रवक्ता रणधीर जैसवालले ट्रम्प र मोदीबीच फोन कुराकानी नै नभएको बताएका छन्।
पछि एक विज्ञप्ति निकाल्दै उनले अमेरिकासँग ऊर्जा सहयोगलाई गहिरो बनाउनेबारे भारतले छलफल गरिरहेको बताए। तर भारतले रूसी तेल खरिद गर्न बन्द गर्दैछ भन्ने ट्रम्पको दाबीको पुष्टि गरेनन्।
ट्रम्प र मोदीबीच अघिल्लो दिन भएको भनिएको कुराकानीबारे जानकारी नै नभएको जिकिर गरे।
रूसी कच्चा तेल किनेको भनेर अमेरिकी राष्ट्रपति ट्रम्पले भारतलाई उच्च भन्सार महशुल लगाएका छन्।
ट्रम्पले जुलाईको अन्त्यमा भारतबाट आयात हुने सबै सामानमा २५ प्रतिशत भन्सार लगाउने घोषणा गरेका थिए। त्यसपछि भारतले अझै रूसी कच्चा तेल किनिरहेको भनेर अगस्ट २७ देखि लागू हुने गरी भारतबाट आयात हुने सबै सामानमा थप २५ प्रतिशत भन्सार शुल्क लगाए।
त्यसपछि भारतले रूसी तेलको खरिद केही घटाए पनि अझै पनि किनिरहेको छ।
सन् २०२२ फेब्रुअरीमा रूसले युक्रेनमाथि आक्रमण गरेपछि अमेरिका लगायत पश्चिमा देशले रूसी तेलमा प्रतिबन्ध लगाएका छन्।
तर भारतले भने सस्तोमा रूसी तेल किनिरहेको छ।
त्योभन्दा अघि नगन्य मात्रामा रूसी तेल किन्ने भारत त्यसपछिका दिनमा भने रूसको मुख्य ग्राहक बनेको छ।
यसरी सस्तोमा रूसी तेल किनेको सबभन्दा धेरै फाइदा भारतीय अर्बपति मुकेश अम्बानीको रिलायन्स इण्डस्ट्रिज र अर्को निजी कम्पनी नायरा एनर्जीलाई भएको भनेर भारतीय पत्रिका द बिजनेस स्टयान्डर्डले लेखेको छ।
रूसी लगानी रहेको नायरा एनर्जीमा रूसको सरकारी तेल कम्पनी रसनेफ्टको झण्डै ५० प्रतिशत सेयर छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
1635339834.jpeg)
-1746009348.jpg)
