चीनका राष्ट्रपति सी चिनफिङले जनमुक्ति सेना (पिएलए)का दोस्रो वरीयताका जनरल ह वेइदङसहित नौ जना वरिष्ठ कमाण्डरलाई पदमुक्त गरेका छन्।
चिनियाँ रक्षा मन्त्रालयले एक वक्तव्य जारी गर्दै राष्ट्रपति सीले जनरल वेइङदङसहित पिएलएका सेन्ट्रल मिलिटरी कमिसन (सिएमएसी) का ९ जना जनरलहरूलाई बर्खास्त गरिएको फाइनान्सियल टाइम्सले जनाएको छ।
बर्खास्तीमा परेकाहरूमा वेइङदङ, सिएमसीका अर्का सदस्य मिआओ हुआ, सीएमसी राजनीतिक कार्य विभागका पूर्व उपप्रमुख ह हङजुन र पिएलए रकेट फोर्सका प्रमुख वाङ हाउबिन लगायत वरिष्ठ कमाण्डरहरू रहेको छन्।
त्यस्तै पिएलए रकेट फोर्सका पूर्व कमान्डर ली युचाओ र लिउ गुआङबिन, रकेट फोर्सकै पूर्व राजनीतिक कमिश्नर झोउ यानिङ, पिएलएका नौसेना विभागका वरिष्ठ अधिकारी छु झोङ्बो, सशस्त्र विभागका वरिष्ठ कमान्डर झाङ झेनझङलाई पनि बर्खास्त अन्तर्राष्ट्रिय समाचार संस्था रोयटर्स लगायतका सञ्चारमाध्यमहरूले जनाएका छन्।
यी नौ अधिकारीहरू भ्रष्टाचार र पदसम्बन्धी अपराधमा संलग्न भएको ठोस प्रमाण भेटिएकाले कारबाही गरिएको रक्षा मन्त्रालयले जनाएको छ।
सीको यो कदमलाई हालसम्मकै सबैभन्दा ठूलो सैन्य शुद्धीकरण अभियानको रूपमा हेरिएको भनेर फाइनान्सियल टाइम्सले लेखेको छ।
ह वेइदङ सिएमसीका दुई उपाध्यक्षमध्ये एक हुन्। उनी कम्युनिस्ट पार्टीको पोलिटब्युरोका सदस्यसमेत हुन् भने पिएलएका तेस्रो शीर्ष अधिकारी थिए। उनी वरिष्ठ उपाध्यक्ष बन्ने तयारीमा समेत थिए।
उनीहरूलाई पार्टीबाट निष्कासन गरी सैन्य अभियोजन कार्यालयमा मुद्दा पठाइएको पनि चिनियाँ रक्षा मन्त्रालयले बताएको छ।
उनीहरूको बर्खास्ती चीनको इतिहासमा करिब ६० वर्षपछि पहिलो पटक त्यस्तो उच्च तहका सैन्य अधिकारी हटाइएका हुन्।
मन्त्रालयले यो कदमलाई सेनालाई अझै सुदृढ, एकीकृत र युद्धका लागि तयार बनाउने दिशामा ठूलो उपलब्धि भनेको छ। यसबाट भ्रष्टाचार गर्नेका लागि सेनामा कुनै ठाउँ नरहेको सन्देश दिएको पनि भनेको छ।
सीले सन् २०२३ देखि सेनाभित्रको भ्रष्टाचारविरोधी अभियान तीव्र बनाएका थिए।
सुरूवातमा खरिद–व्यवस्थापनमा संलग्न अधिकारीहरूमाथि अनुसन्धान चलाइएको थियो, तर अहिले यो अभियान स्थलीय, नौसेना, रकेट फोर्स र सशस्त्र प्रहरी सबै शाखामा फैलिएको छ।
विश्लेषकहरूका अनुसार, यो व्यापक शुद्धीकरणले केवल आर्थिक अनियमिततासँग सीमित नभई सैन्य नेतृत्वप्रति सी जिनपिङको विश्वासको संकट पनि देखाउँछ।
रूस–युक्रेन युद्धपछि सीको यो अभियान झनै कडा बनेको भनेर फाइनान्सियल टाइम्सले लेखेको छ।
यसैबीच, चिनियाँ कम्युनिस्ट पार्टीको केन्द्रीय समितिको आगामी बैठकमा नयाँ पाँच वर्षे विकास योजनाबारे छलफल हुने भएको छ। बैठकमा सैन्य पुनर्संरचना पनि प्रमुख एजेन्डा बन्ने अनुमान गरिएको छ।
1635339834.jpeg)
-1746009348.jpg)
