राष्ट्रिय प्रजातन्त्र पार्टीका महामन्त्री धवल शम्शेर राणाले चुनावभन्दा पनि आन्दोलनबाट संविधान फालेर राजसंस्था ल्याउनतिर अघि बढ्नुपर्ने अभिव्यक्ति दिएका छन्।
शाही युवा शक्ति नेपालले शनिबार सामाखुसीमा गरेको कार्यक्रममा बोल्दै 'संयुक्त जनआन्दोलन समिति'का कार्यवाहक अध्यक्षसमेत रहेका राणाले भने, ‘जेनजी भाइबहिनीहरूलाई मेरो आग्रह छ, दुई तीन महिनापछि चुनाव भयो भने त्यही जसको कारणले आन्दोलन र भ्रष्टाचार भएर देश गरिबीको रेखामुनि पुगेको छ, फेरि त्यही नेता र त्यही पार्टीहरू आउने ठूलो सम्भावना छ।’
उनले फागुन २१ को प्रतिनिधि सभा चुनावमाभन्दा पनि आन्दोलनमा केन्द्रित हुनुपर्ने बताए।
‘हामीले चुनावमा भन्दा पनि आन्दोलनबाट राजसंस्थालाई कायम गरौं, यो संविधान र प्रदेशहरू हटाऔं, स्थानीय तह घटाऔं, नेता पाल्न देशको पैसा खर्च गर्ने होइन,’ उनले भने, ‘राजासहित हिन्दु राष्ट्र ल्याउन फेरि आन्दोलन गर्न परे हामी तपाईंहरूलाई साथ दिन्छौं।’
उनले मुलुकको शान्ति र समृद्धिका लागि जनताहरू फेरि एकपटक घरघरबाट आन्दोलनमा निस्कनुपर्ने पनि बताए।
राप्रपाले भने फागुन २१ को चुनावमा जाने बताइरहेको छ।
1635339834.jpeg)
-1746009348.jpg)
