अमेरिकी राष्ट्रपति डोनाल्ड ट्रम्पसँग केही दिन अघि भएको फोन कुराकानीमा रूसी राष्ट्रपति भ्लादिमिर पुटिनले रूसको पूर्ण नियन्त्रणमा नरहेको दोनेत्स्क युक्रेनले दिनुपर्ने बताएका छन्।
युद्ध अन्त्यका लागि आफ्नो कब्जामा रहेको क्राइमिया र डोनबास क्षेत्रका युक्रेनी भूभाग मात्रै नभएर आफ्नो नियन्त्रणमा नभएका केही भागको पनि स्वामित्व दिनुपर्ने पुटिनले माग गर्दै आएका छन्।
झण्डै एक दशकदेखि लगातार आक्रमण गरे पनि पुटिनले डोनबास क्षेत्र पूर्ण रूपमा कब्जा गर्न सकेको छैन। लुहान्स्क र दोनेत्स्कलाई संयुक्त रूपमा डोनबास क्षेत्र भन्ने गरिन्छ। लुहान्स्कको लगभग सबैजसो भाग रूसले कब्जा गरे पनि दोनेत्स्कको १० प्रतिशत भन्दा बढी भाग युक्रेनकै नियन्त्रणमा छ।
त्यहाँ युक्रेनले वर्षौंदेखि बलियो रक्षात्मक संरचना बनाएकाले रूसले युद्ध गरेर लिन निकै मुश्किल हुने मानिन्छ। सो भूभाग रूसलाई दिए रूसले त्यहाँबाट अगाडि बढ्न फेरि आक्रमण गरे रोक्न नसकिने भएकाले युक्रेनको सो शर्त अस्वीकार गर्दै आएका छ।
पछिल्ला दिनमा युक्रेनले प्रयोग गर्ने गरी युरोपेली देशलाई टमाहक मिसाइल दिने भनेर ट्रम्पले धम्की दिएपछि पुटिनले बिहिबार ट्रम्पसँग फोनमा कुराकानी गरेका थिए।
पुटिनकै पहलमा भएको सो कुराकानीमा पुटिनले फेरि दोनेत्स्क पूर्ण रूपमा रूसको नियन्त्रणमा हुनु पर्ने माग राखेको भनेर द वाशिङटन पोस्टले जनाएको छ।
त्यसको बदलामा बरू रूसको नियन्त्रणमा रहेको जापारोजिया र खेर्सनको केही भूभाग युक्रेनलाई दिन तयार भएको भनेर सो कुराकानीबारे जानकार दुई वरिष्ठ अमेरिकी अधिकारीको हवाला दिँदै पोस्टले लेखेको छ।
ट्रम्पसँग अलस्कामा भएको भेटमा भने डोनबास क्षेत्रको पूर्ण नियन्त्रणको बदलामा रूसको नियन्त्रणमा रहेको जापारोजिया र खेर्सनको केही भूभाग फिर्ता दिने कुरा पुटिनले गरेका थिएनन्। शायद त्यसै कारण पुटिनसँग चाँडै हंगेरीको राजधानी बुडापेस्टमा भेट्न ट्रम्प तयार भएका हुन सक्छन्।
अनि त्यसैले शुक्रबार ह्वाइट हाउसमा युक्रेनी राष्ट्रपति भोलोदिमिर जेलेन्स्कीसँगको भेटमा ट्रम्पले टमाहक मिसाइल बेच्न नमानेको भनिन्छ।
अलस्काको भेटेपछि पनि युद्ध रोक्न कुनै चासो नदेखाएका पुटिनले अमेरिकाले टमाहक मिसाइल बेच्न सक्ने डरले ट्रम्पसँग कुराकानी गरेको मानिन्छ।
युद्ध रोक्न रूस नमाने टमाहक मिसाइल बेच्ने अडानमा ट्रम्प रहिरहे बुडापेस्टको भेटमा पुटिन अलस्कामा भन्दा अलिक लचिलो हुन सक्ने अपेक्षा गरिएको छ। अहिले रूसको नियन्त्रणमा भएको भाग मात्रै दाबी गर्न पुटिन राजी भए भने युक्रेनसँगको युद्ध रोकिने सम्भावना बढ्नेछ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
1635339834.jpeg)
-1746009348.jpg)
