नेत्रविक्रम चन्द विप्लव नेतृत्वको नेपाल कम्युनिष्ट पार्टीले माओवादी लगायत कम्युनिष्ट पार्टीसँग एकताका लागि पहल गर्ने निर्णय गरेको छ।
असोज २६ देखि ३० गतेसम्म बसेको केन्द्रीय समिति बैठकले माओवादी केन्द्र लगायत अरू कम्युनिष्ट पार्टीहरूबीच एकताका लागि पहल गर्ने निर्णय गरेको हो।
नेकपाले केन्द्रीय कमिटी बैठकको निर्णय आइतबार पत्रकार सम्मेलन गरी सार्वजनिक गरेको हो।
जेनजी आन्दोलनपछि कम्युनिष्टहरूबीचको एकता र कम्युनिष्ट केन्द्र निर्माणको आवश्यकता अझै बढेको नेकपाको निष्कर्ष छ।
त्यसका लागि केवल संगठनात्मकरुपले एकठाउँमा जम्मा हुने तिरबाट नसोचेर राजनीतिक विचार, कार्यदिशा, कार्यक्रम, संगठनात्मक मान्यता, आर्थिक जीवनपद्धति, संस्कृतिसहित नयाँ आन्दोलन र मूल्य निर्माण गर्ने स्तरबाट ग्रहण र प्रयोग गर्नु पर्ने नेकपाले निर्णय गरेको छ।
'यसका लागि नेकपाले समाजवादी मोर्चामा आबद्ध पार्टी, माओवादी घटक, सबै कम्युनिस्ट पार्टीसँग छलफल बढाउने र आफ्नो ठाउँमा जुनकुनै योगदान गर्न तयार रहने निर्णय लिएको छ,' पार्टीको निर्णयमा भनिएको छ।
माओवादी केन्द्रले यसअघि केन्द्रीय कमिटी बैठकबाटै विप्लप नेतृत्वको नेकपासँग एकता गर्ने निर्णय गरेको थियो।
नेकपाले जेनजी आन्दोलनपछि गठन भएको सरकार आन्दोलन, विद्रोह र निकासको आवश्यकतासँग मेल नखाने बताएको छ।
सरकारको निर्माणले न सबै विद्रोही, संघर्षरत शक्तिलाई जोड्न सकेको छ नत आन्दोलनको उचाइलाई नै पकड्न सकेको छ । यसले आउँदो दिनमा अर्को संघर्ष र विद्रोहको सृजना गर्ने निश्चित छ । तसर्थ यदि देशलाई वास्तविक निकासतिर डोर्याउने हो भने सुशीला कार्की नेतृत्वको अन्तरिम सरकार खारेज हुनु पर्दछ र यसको ठाउँमा जेनजी, किसान, मजदुर, महिला, दलित, जनजाति, मधेशी, बुद्धिजीवी, राजनीतिक दलहरु सम्मिलित सर्वपक्षीय अन्तरिम सरकार गठन हुनु पर्दछ,' नेकपाको निर्णयमा भनिएको छ।
नयाँ बन्ने अन्तरिम सरकारले कार्यकारी अधिकार प्रयोग गरी संविधान संशोधन गर्नुपर्ने नेकपाको निष्कर्ष छ।
'एउटा उच्चस्तरीय संविधान लेखन आयोग गठन गर्नुपर्छ । संविधानको पुनरलेखन गर्दै राज्यलाई पुनरसंरचना गर्दै, प्रत्यक्ष कार्यकारी प्रमुखको व्यवस्था गर्दै, उत्पीडित जातिहरुको अग्राधिकारसहितको समाजवादी संघीय राज्य निर्माण गर्नुपर्दछ,' निर्णयमा भनिएको छ।
-1693477835.jpg)
1635339834.jpeg)
-1746009348.jpg)
