बैठक गर्न आवश्यक हल निर्माणका लागि ७ करोड रुपैयाँको लागत तयार भएपछि राष्ट्रिय सभाका अध्यक्ष नारायण दाहालले सहरी विकास मन्त्री कुलमान घिसिङलाई फोन गरेर ध्यानाकर्षण गराएका छन्।
अध्यक्ष दाहालले केहीअघि प्रधानमन्त्री सुशीला कार्कीसँग प्रतिनिधि सभा विघटन भए पनि राष्ट्रिय सभा यथावत् रहेको र बैठक गर्नका लागि हल आवश्यक भएको विषयमा ध्यानाकर्षण गराएका थिए।
संघीय संसदको नयाँ भवन निर्माणाधीन भए पनि तत्कालै बैठक गर्न सकिने गरी तयार भएको छैन। बैठक हलको काम समेत सुरू भएको छैन। अध्यक्ष दाहालले सिंहदरबारमै रहेको पुरानो राष्ट्रिय सभाको हललाई प्रयोग गर्न सकिने बताएका थिए।
लगत्तै प्रधानमन्त्री कार्कीले राष्ट्रिय सभाका लागि आवश्यक हल तयार गर्न सहरी विकास मन्त्रालयलाई निर्देशन दिएकी थिइन्।
पुरानो राष्ट्रिय सभाको हलमा पछिल्लो समय प्रतिनिधि सभाको कृषि तथा सहकारी समितिको बैठक बस्दै आएको छ। बहुउपयोगी उक्त हलमा झण्डै २ सय सिट रहेको छ।
त्यसपछि सहरी विकास मन्त्रालय र संघीय संसद सचिवालयले राष्ट्रिय सभाको बैठकका लागि ७ करोड लागतमा हल तयार गर्ने प्रस्ताव तयार पारेका थिए। तर अध्यक्ष दाहालले नयाँ भवन निर्माणाधीन रहेको र चालु अवस्थामा रहेको हलका लागि ठूलो खर्च नगर्न सुझाव दिएका छन्। कर्मचारीले करोडौँको लागत पेस गरेपछि अध्यक्ष दाहालले सहरी विकास मन्त्री कुलमान घिसिङलाई ध्यान दिन आग्रह गरेका हुन्।
सहरी विकास मन्त्रालयले राष्ट्रिय सभाका अध्यक्षका लागि छुट्टै भर्याङ बनाउनेदेखि सिटहरूको व्यवस्थापन हेरफेर गर्ने नयाँ बाटो बनाउने, सुरक्षाका लागि घेरबार गर्ने गरी प्रस्ताव गरेको थियो। तर अध्यक्ष दाहालले त्यसमा आपत्ति जनाएका हुन्।
‘मेरा लागि छुट्टै भर्याङ चाहिँदैन। सांसदहरू जहाँबाट भित्र छिर्छन् म त्यहीँबाट छिर्छु भनेको छु’, राष्ट्रिय सभाका अध्यक्ष दाहालले भने, ‘सिटहरू पहिला नै छन्। अध्यक्ष बस्ने र कर्मचारी बस्ने ठाउँ र रोष्टम बनाउँदा हुन्छ भनेको छु।’
सहरी विकास मन्त्रालय र संघीय संसद सचिवालयले भने सभाको बैठक सञ्चालनका लागि धेरै समान आवश्यक पर्ने जनाएको छ।
‘माइक सिस्टम चाहियो। लाइभ गर्न क्यामेरा चाहियो। एउटै क्यामेराको कम्तीमा २० लाख पर्छ’, संसद सचिवालयका एक अधिकारीले भने, ‘लाइभ गर्ने सिस्टम चाहियो। आवश्यकता बाहेक हामी धेरै खर्च गर्दैनौँ।’
अध्यक्ष दाहाल भने सानो खर्चमा काम चलाउने गरी अघि बढ्नुपर्ने पक्षमा छन्।
‘अहिले भएकै सिटहरूमा दलहरूको नाम टाँसेर बैठक सञ्चालन गर्नुपर्छ,’ दाहालले भने, ‘माइक सिस्टम छँदैछ। आगलागीमा जोगिएको एउटा क्यामेरा रहेछ। अर्को एउटा थपेर बैठक गर्न सकिन्छ।’
दाहाल आफूलाई बैठक सञ्चालन गर्न असुरक्षा नभएको दाबी गर्छन्।
‘बैठक कक्षमा हुने भनेका सांसदहरू हुन्। मलाई सांसदहरूबाट असुरक्षा छैन,’ दाहालले भने, ‘दर्शकहरू र पत्रकारहरूलाई केही सिट व्यवस्थापन गरेर बैठक गर्न सकिन्छ।’
हल निर्माणमा नै ठूलो खर्च गर्न खोजिएपछि अध्यक्ष दाहालले मन्त्री घिसिङलाई जानकारी गराएका हुन्। लगत्तै घिसिङ निर्माणाधीन संघीय संसदको भवनको अवलोकन गर्न गएका थिए।
-copy-1761394385.jpg)
-1746009348.jpg)
