अमेरिकी राष्ट्रपति डोनाल्ड ट्रम्पले चीनमाथिको भन्सार दर घटाउने घोषणा गरेका छन्।
दक्षिण कोरियामा चिनियाँ राष्ट्रपति सी चिनफिङ नेतृत्वको प्रतिनिधिमण्डलसँग वार्तापछि ट्रम्पले चिनियाँ आयातमा १० प्रतिशत भन्सार घटाउने घोषणा गरेका हुन्।
उनले राष्ट्रपति सीसँगको वार्ता सकारात्मक भएको बताउँदै भन्सार दर ५७ प्रतिशतबाट १० प्रतिशत घटाएर ४७ प्रतिशत कायम गरिने बताएका हुन्।
'१० उपयुक्त नम्बर हो भनेर त्यो बिन्दुले भन्सार घटाउने निर्णय भएको छ,' ट्रम्पले दक्षिण कोरियाबाट वाशिङ्टन फर्कँदै गर्दा एयरफोर्स वानमा पत्रकारहरूसँग भने।
आफ्नो दोस्रो कार्यकाल सुरू गरे लगत्तै ट्रम्पले चीनसँग व्यापार युद्ध गरेका थिए।
त्यतिबेला ट्रम्पले चीनमाथि भन्सार बढाएर १४५ प्रतिशतसम्म पुर्याएका थिए।
चीनले अमेरिकासँग नझुक्ने रणनीति लिएर भन्सार दर १२५ प्रतिशत सम्म पुर्याएको थियो।
त्यतिबेला स्वीटजरल्याण्डमा दुई देशका उच्च अधिकारीहरूले वार्ता गरेर भन्सार दर ११५ प्रतिशत बिन्दुले घटाउने निर्णय गरेका थिए।
त्यसयता पटक पटक अमेरिका र चीनबीच व्यापार सम्बन्धमा उतारचढाव देखिएको थियो।
दक्षिण कोरियामा वार्ता तय भएपछि चीनले दुर्लभ खनिज निर्यातमा कडाइ गरेको थियो।
खनिज निर्यातमा कडाइ गरेपछि ट्रम्पले चीनमाथिको भन्सार एक सय प्रतिशत बढाएका थिए।
त्यसपछि ट्रम्पले अस्ट्रेलियासँग खनिज सम्झौता गरिसकेका छन्।
ट्रम्पले आगामी अप्रिल महिनामा आफू चीन भ्रमणमा जाने पनि बताए।
आफू चीन गएपछि चिनियाँ राष्ट्रपति सीले पनि अमेरिका भ्रमण गर्ने उनले बताए।
छलफलमा अमेरिकी अत्याधुनिक चिप्सहरू चीनमा निर्यात गर्ने विषयमा पनि कुराकानी भएको ट्रम्पले बताएका छन्।
साथै अत्यन्तै दुर्लभ खनिजहरूको सम्बन्धमा चीनले थप एक वर्ष निर्यातमा कडाइ नगर्ने सहमति भएको भनेर पनि ट्रम्पले पत्रकारहरूलाई जानकारी दिएका छन्।
यद्यपि व्यापार सम्झौतामा हस्ताक्षर पनि नभएको उनले बताए।
'हामी चाँडै नै व्यापार सम्झौतामा हस्ताक्षर पनि गर्छौं,' ट्रम्पले पत्रकारहरूसँग भने।
दक्षिण कोरियामा भएको छलफल र त्यहाँ भएका सहमतिबारे चिनियाँ पक्षले भने अहिलेसम्म केही खुलाएको छैन।
-1746009348.jpg)
