नेकपा (एकीकृत समाजवादी) का सम्मानित नेता झलनाथ खनालले माअोवादी केन्द्रसँग एकता गर्दा पार्टी सग्लो नरहने बताएका छन्। बिहीबार केन्द्रीय कमिटी बैठकमा बोल्दै सम्मानित नेता खनालले अध्यक्ष माधव नेपाललाई पार्टी दुई टुक्रा पारेर एकतामा जान मिल्छ भनी प्रश्न गरेका हुन्।
‘यो एकिकरणले के जन्माउनेवाला छ त? चार वर्षअगाडि बनाएको हाम्रो पार्टी गठनको औचित्य रहेन छ भन्ने कुरा जन्माउने छ,’ उनले भने, ‘माधव कमरेडलाई म सोध्न चाहन्छु– यो चार वर्ष यात्रा गरेर यो पार्टीलाई दुई टुक्रा पारेर तपाईं कता जनु हुन्छ? यो मिल्छ? मिल्दैन।’
उनले अहिले उथलपुथलको अवस्था रहेको र त्यसले विभाजन हुँदै रूपान्तरणमा पुर्याउने पनि बताए।
‘उथलपुथल छ, उथलपुथलले विभाजन र विभाजनले रूपान्तरण ल्याउँछ,’ उनले फेरि एकतामै केन्द्रित हुँदै भने, ‘प्रचण्ड पथ, माओवाद के थियो? के भयो? आज कहाँ छ? भित्री राष्ट्रियता, बाहिरी राष्ट्रियता भनेको के हो? जातीय आत्म निर्णयको अधिकार सम्बन्धमा के हो? साउथ एसिया फेडेरेसन भनेको के हो?,’ उनले भने।
उनले पार्टी कार्यालय चलाउनै नसकेर एकतामा जानुपरेको हो भनेर समेत सोधेका थिए।
‘यो बैठक चलाउने सम्बन्धमा पनि चन्दा उठाएका छौं। दुई–दुईपटक कार्यालय जल्यो, बनाउन गाह्रो भएको छ होला! आर्थिक समस्याले हो भने पनि क्लिएर भनौं। सक्दैनौं भनौं,’ उनले भने।
विगतमा नेपाली कांग्रेससँगको सत्ता सहकार्यले पार्टी भुत्ते बनेको समेत खनालले टिप्पणी गरे।
‘२–२–१ को सुत्रमा लाग्नुभएको रहेछ! भित्र यस्तो स्झौता बनेको रहेछ। दुई वर्ष माओवादी, दुई वर्ष कांग्रेस र एक वर्ष समाजवादी (माधव नेपाल) प्रधानमन्त्री बन्ने भन्ने कुराले हामी कांग्रेसलाई बोल्न र भन्न नसक्ने भयौं। जसले गर्दा पार्टी भुत्ते भयो। पार्टीमा उठिरहेका वा भएका नीतिगत बेठिक कुराहरूको बिषयमा म बोलिरहेको छु। तर माधव कमरेड र उहाँसँग रहेकाहरू बोल्नुहुँदैन,’ उनले भने।
खनालले एकीकृत समाजवादी गलत कार्यदिशा र गलत नेतृत्वको मुनि रहेको टिप्पणी गरे।
‘हामी चुनावमा एक्लै लडेको भए हाम्रो १२/१३ लाख मत आउँथ्यो। गठबन्धन गरेकाले मत कम आयो,’ उनले भने।
-1746009348.jpg)
