महोत्तरी जिल्लामा नेकपा (एमाले)को पार्टी सदस्यता (संगठित सदस्य) ३३ हजार २८७ जना पुगेका छन्। नेकपा (एमाले)ले दोस्रो विधान महाधिवेशनमा प्रस्तुत गरेको सांगठनिक प्रतिवेदन र केन्द्रीय कार्यालयले अद्यावधिक गरेको विवरण अनुसार महोत्तरी जिल्लामा पार्टी सदस्य ३३ हजार नाघेको हो।
यो विवरणअनुसार एमालेले महोत्तरीले पार्टीले प्राप्त गरेको समानुपातिक मतभन्दा पनि बढी पार्टी सदस्य पुगेको देखिएको छ।
२०७९ सालको प्रतिनिधि सभा निर्वाचनमा महोत्तरीमा समानुपातिकतर्फ एमालेले तेस्रो हुँदै ३२ हजार ३४७ मत ल्याएको थियो। महोत्तरीमा लोकतान्त्रिक समाजवादी पार्टी ३७ हजार ३२ मतसहित पहिलो र जनमत पार्टी ३३ हजार ४७४ मतसहित दोस्रो भएको थियो। त्यस्तै प्रदेश सभा निर्वाचनतर्फ त एमाले चौथो भएको थियो। प्रदेश सभातर्फ एमालेको २८ हजार ८३२ मत मात्रै आएको थियो।
गुटगत प्रतिस्पर्धाका कारण मधेसमा एमालेको पार्टी सदस्यता ह्वात्तै बढेको एमालेका नेताहरूले बताएका छन्। यसपटक मधेसमा एमालेको पार्टी सदस्यता १ लाख ५६ हजार ४१ जना पुगेका छन्। २०७९ को प्रतिनिधि सभा निर्वाचनमा एमालेले समग्र मधेस प्रदेशमा ३ लाख ७१ हजार ७०९ मत प्राप्त गरेको थियो। प्रदेश सभातर्फ ३ लाख ५१ हजार ७६८ मत ल्याएको थियो।
मधेसमा एमालका इन्चार्ज लिलानाथ श्रेष्ठ, केन्द्रीय सचिव रघुवीर महासेठ, केन्द्रीय सदस्य सरोज यादव लगायतबीच प्रतिस्पर्धा छ। आफूअनुकूलका मानिस प्रतिनिधि ल्याउन पनि उनीहरूबीच पार्टी सदस्यतामा पनि प्रतिस्पर्धा देखिएको नेताहरूले बताएका छन्।
जसका कारण पनि कतिपय जिल्लामा पार्टीले प्राप्त गरेको भोटभन्दा बढी पार्टी सदस्यता पुर्याइएको छ। त्यसको असर आगामी मंसिर २७, २८ र २९ गते हुने ११ औं महाधिवेशनमा देखिने छ। अहिले सबैभन्दा बढी पार्टी सदस्य नै मधेस प्रदेशमा देखिएको छ।
जिल्लागतरूपमा बढी धनुषामा पार्टी सदस्य पुगेका छन्। धनुषा रघुवीर महासेठ, उनकी पत्नी जुली महतोको जिल्ला हो।
धनुषामा पार्टी सदस्य झन्डै आधा लाख पुगेका छन्। त्यहाँ ४८ हजार ६६६ जना पार्टी सदस्य छन्।
त्यसपछि महोत्तरीमा ३३ हजार २८७, पर्सामा १८ हजार १४९, सिराहामा १४ हजार ३८१ जना पुगेका छन्।
मधेस प्रदेशमा सबैभन्दा कम सर्लाहीमा ९ हजार २१९ जना पार्टी सदस्य रहेको विवरण केन्द्रीय कार्यालयले अद्यावधिक गरेको छ।
एमालेको कुल पार्टी सदस्यता ६ लाख ६७ हजार ६३० पुगेको एमाले उपमहासचिव प्रदीप ज्ञवालीले जानकारी दिएका छन्।
दोस्रो विधान महाधिवेशनमा ६ लाख ६२ हजार ९६१ थिए। विवरण पछिल्लो पटक अद्यावधिक गर्दा केही संख्या थपिएको हो।
-1746009348.jpg)
