नेकपा (एमाले) का महासचिव शंकर पोखरेलले अहिलेको सरकार भदौ २३ र २४ गतेको घटनामा अपराध र आन्दोलनलाई छुट्ट्याउन पूर्णतः असफल भएको बताएका छन्।
सोमबार प्रेस चौतारी नेपालले सोमबार आयोजना गरेको पत्रकार भेटघाटमा बोल्दै महासचिव पोखरेलले अपराध र आन्दोलनलाई छ्यासमिस पार्ने प्रयत्न भइरहेको बताए।
‘राज्यका प्रतिष्ठाका केन्द्रहरूमा आगजनी र लुटपाट गर्ने कुरा, यस प्रकारका कामहरू अहिलेका नवयुवा पुस्ताले गर्न सक्छ कि सक्दैन, उनीहरूको आन्दोलनको विषय थियो कि थिएन? भन्ने कोणबाट हेर्ने हो भने उनीहरूले आन्दोलनको विषय थिएन। र उनीहरूले त्यस्तो काम गर्न सक्दैनन् भन्ने हामी ठान्छौं। त्यस कारण जसले त्यो काम गरे तिनीहरू राष्ट्रका अपराधीहरू हुन् भन्ने कुरा बुझ्नुपर्छ। जसले सुनियोजित हिसाबले ती काममा प्रयोग गर्ने योजना बनाए। तिनीहरूको पहिचान गरेर कारबाही गर्नुपर्छ। हाम्रो पार्टीको मान्यता रहँदै आएको छ,’ उनले भने, ‘तर अहिलेको सरकार अपराध र आन्दोलनलाई छुट्ट्याउने कुरामा पूर्णत असफल छ।’
त्यस कारण एमालेले बारम्बार आन्दोलनलाई सम्बोधन गर्न सकिने तर अपराधलाई दण्डित गर्नुपर्ने बताउँदै आइरहेको जानकारी दिए। ‘आन्दोलन र अपराध छ्यासमिस पार्ने कुरा उचित होइन,’ उनले भने।
महासचिव पोखरेलले भदौ २३ गतेको आन्दोलनको माग सरकार समक्ष नै नपुगेको बताए। आन्दोलनको नेतृत्व गर्नेको पहिचानसमेत नभएकाले माग पूरा गराउन सरकार चासो नदेखाएको भन्ने तर्क पनि सान्दर्भिक समेत नरहेको बताए।
-1746009348.jpg)
