नेपाली कांग्रेसका केन्द्रीय सदस्य उदय शम्शेर राणाले विशेष महाधिवेशन गर्न नहुने बताएका छन्।
विशेष महाधिवेशनमा गए पार्टी फुट्न सक्ने उनले बताएका हुन्।
आजको केन्द्रीय समिति बैठकमा बोल्दै उनले भने, ‘बहुमत र अल्पमतको कुरा गरेर यसले पार्टीलाई धेरै सहयोग पुग्दैन। मेरो मुख्य धारणा के हो भने, हामी कुनै पनि हालतमा विशेष महाधिवेशनमा जान हुँदैन, पार्टी फुट्ने सम्भावना हुन्छ।’
कांग्रेसका ५४ प्रतिशत महाधिवेशन प्रतिनिधिहरूले विशेष महाधिवेशन माग गर्दै असोज २९ गते कार्यवाहक सभापति पूर्णबहादुर खड्कालाई हस्ताक्षर बुझाएका थिए।
साथै राणाले कांग्रेसबाट प्रजातान्त्रिक बनेका बेलाको प्रसंग पनि सुनाएका थिए। त्यसबेला आफ्ना बाबु ललितपुर कांग्रेस सभापति रहेको र सुरूमा भेला गरेको बताउँदै उनले आजका दिनसम्म पनि गल्ती गरेँ भनेर भनेको सुनाए। ‘त्यसैले त्यतातिर नजाऔं, सहमति गरौं,’ उनले भने।
महाधिवेशनबारे केन्द्रीय समितिमा दुई वटा धारणा आएकोले त्यसलाई मिलाएर लैजाने काम कार्यवाहक सभापतिको भएको पनि उनको भनाइ थियो।
उनले विशेष कि नियमित वा पुसमा गर्ने कि वैशाखमा भन्ने विषयमा केन्द्रीय समितिमा छलफल भइराखेको बताए। ‘यही मात्र हो नेपालको राजनीतिमा एजेन्डा?’ उनले भने, ‘एमालेले एउटा लाइन समातिसक्यो, माओवादीले साना पार्टी मिलाएर कम्युनिष्ट एलाइन्स सुरूवात गरेको छ। स्वतन्त्र पार्टी र बालेन शाहको पनि सक्रियता छ।’
-1746009348.jpg)
