नेपाली कांग्रेसको १५ औं महाधिवेशन समयमै गर्नुपर्ने भन्दै भेला आह्वान भएको छ।
२८ असोजदेखि केन्द्रीय समिति बैठक बसे पनि १५ औं महाधिवेशन कहिले गर्ने भन्नेमा केन्द्रीय समितिले निर्णय गर्न सकेको छैन।
महामन्त्री गगन थापाले पुस १६ देखि १९ गतेसम्म महाधिवेशन गर्ने गरी प्रस्ताव पेस गरेका छन् भने सहमहामन्त्री महेन्द्र यादवले पनि बोल्ने क्रममा वैशाख मसान्तमा महाधिवेशन उपयुक्त हुने बताएका थिए। आज पनि सानेपामा केन्द्रीय समिति बैठक बस्दैछ।
महाधिवेशन तिथिमिति घोषणा गर्न ढिलाइ भइरहेका बेला नियमित महाधिवेशन पक्षधरले आज भेला गर्न लागेका हुन्।
आज बत्तिसपुतलीमा भेला हुने नेविसंघ पूर्वमहामन्त्री दीपक भट्टराईले जानकारी दिए। ‘समयमै नियमित महाधिवेशन गर्न दबाबमूलक बृहत भेला गर्न लागिएको हो,’ उनले भने।
यो भेला सभापति शेरबहादुर देउवानिकट, नेता शेखर कोइरालानिकट, पूर्वमहामन्त्री शशांक कोइरालानिकटले आयोजना गरेका हुन्।
यसअघि विशेष महाधिवेशन पक्षधरले पनि भेला गरेका थिए। विशेष महाधिवेशन माग गर्दै ५४ प्रतिशत महाधिवेशन प्रतिनिधिहरूले हस्ताक्षर बुझाएका छन्। नियमित महाधिवेशन पक्षधरले भने विशेष महाधिवेशन गर्न नहुने बताइरहेका छन्।
-1746009348.jpg)
