नेपाली कांग्रेसका केन्द्रीय सदस्य नैनसिंह महरले पार्टीको हरेक तहमा ३३ प्रतिशत बढी युवा प्रतिनिधित्व सुनिश्चित गरिनुपर्ने बताएका छन्।
कांग्रेसभित्र युवा पुस्ताको निर्णायक सहभागिता सुनिश्चित गर्न पार्टीका हरेक तहमा ३३ प्रतिशतभन्दा बढी नयाँ युवा पुस्ताको प्रतिनिधित्व अनिवार्य गर्नुपर्ने आफूले प्रस्ताव राखेको उनले जानकारी दिए।
आजको केन्द्रीय समिति बैठकमा लिखित धारणा राख्दै उनले विधानलाई नै ‘युवामैत्री’ बनाउन आग्रह गरेका हुन्।
पछिल्लो समय युवाहरूमाझ पार्टीप्रतिको आकर्षण घट्दै गएको र नेतृत्व पंक्तिमा पुस्तान्तरणको बहस चलिरहेका बेला महरको यो प्रस्ताव आएको छ।
उनले पार्टीलाई समयसापेक्ष, गतिशील र ऊर्जावान बनाउन वडा तहदेखि केन्द्रीय समितिसम्मका सबै संरचनामा युवाहरूको अनिवार्य र अर्थपूर्ण सहभागिता आवश्यक रहेको बताए।
संकटमा नेतृत्व गर्न कांग्रेस चुक्यो
महरले पार्टी नेतृत्व राष्ट्रिय संकटका बेला आफ्नो जिम्मेवारीबाट चुकेको भन्दै गम्भीर आत्मालोचना गरेका छन्। पार्टी व्यक्तिगत स्वार्थ, आन्तरिक गुटबन्दी र खिचातानीमा अल्झिएकाले देशलाई नेतृत्व दिने ऐतिहासिक अवसर गुमाएको उनको भनाइ छ।
पार्टीले संकटका बेला गरेका तीन प्रमुख कमजोरी गरेको बताए।
पार्टीले आन्दोलनरत जेन-जी युवाहरूसँग आधिकारिक वार्ताको पहल गरेन, संकट समाधानका लागि सर्वदलीय राजनीतिक संवादको नेतृत्व गर्न चुक्यो र आन्दोलन एवं त्यसका मागहरूप्रति आफ्नो स्पष्ट आधिकारिक धारणा सार्वजनिक गर्न सकेन। यिनै कमजोरीका कारण पार्टी जनताको नजरमा कमजोर देखिएको उनले बताए।
यी कमजोरीहरूले गर्दा पार्टी र जनताबीच दूरी बढेको भन्दै महरले अबको दायित्व जनताको भरोसा पुनःस्थापित गर्नु रहेकोमा जोड दिएका छन्।
'कुलिङ पिरियड' प्रस्ताव
महरले पार्टीमा लामो समयदेखि एउटै व्यक्तिले विभिन्न अवसर पाइरहने प्रवृत्तिको अन्त्य गर्न 'कुलिङ पिरियड' को अवधारणालाई कडाइका साथ लागू गर्नुपर्ने बताए।
निश्चित अवधि र पटकसम्म लाभको पदमा बसेका नेताहरूले केही समयका लागि सक्रिय कार्यकारी भूमिकाबाट अलग रहेर पार्टीको सल्लाहकार वा 'गाईड' को भूमिका निर्वाह गर्नुपर्ने उनको भनाइ छ।
‘कुलिङ अफ पिरियडको अवधारणालाई कार्यान्वयन गर्नुपर्छ । तीन पटक सांसद र केन्द्रीय समितिमा रहेका, दुई पटक मन्त्री भएका, ७० वर्ष उमेर पुगेका र अवसर पाएर सार्वजनिक जीवनमा प्रश्न उठेका, गठबन्धनबारे निर्णय गर्ने, संसदीय बोर्डमा रहेर टिकट वितरण गर्ने, संयन्त्र र सरकारमा संलग्न नेताहरूले एक पटक कुलिङमा बस्नुपर्छ र गाईडको भूमिका खेल्नुपर्छ,’ उनले भने।
यो प्रस्तावले पार्टीभित्रको अवसरको एकाधिकार तोड्ने, नयाँ विचार र ऊर्जालाई स्थान दिने र निश्चित नेताहरूको वरिपरि मात्र शक्ति केन्द्रित हुने प्रवृत्तिलाई निरुत्साहित गर्ने लक्ष्य राखेको उनी बताउँछन्।
-1746009348.jpg)
