राष्ट्रिय स्वतन्त्र पार्टी (रास्वपा)को विस्तारित बैठक शुक्रबारबाट चितवनको सौराहामा सुरू हुँदैछ। आज बिहान ८ बजेबाट बैठक सुरू हुने भनिए पनि केन्द्रीय समितिले दस्तावेजहरू पारित गर्न समय लगाएको विलम्ब भएको नेताहरूले बताएका छन्। अहिले रास्वपाको केन्द्रीय समिति बैठक बसिरहेको छ भने यो बैठक सकिएपछि विस्तारित बैठक सुरू हुनेछ। बैठक शनिबारसम्म चल्नेछ।
आजको बैठकमा कार्यवाहक सभापति डिपी अर्यालले राजनीतिक प्रतिवेदन प्रस्तुत गर्नेछन्। त्यस्तै महामन्त्री कविन्द्र बुर्लाकोटीले सांगठनिक प्रतिवेदन प्रस्तुत गर्नेछन्।
अर्यालको प्रतिवेदनमा मुलुकको पछिल्लो राजनीतिक घटनाक्रम, त्यसलाई हेर्ने रास्वपाको दृष्टिकोण र अबको कार्यदिशा समेटिएको छ। त्यस्तै महामन्त्री बुर्लाकोटीको प्रतिवेदनमा रास्वपाको सांगठनिक विवरण छ। अहिलेसम्म अधिवेशन भएका पालिका, वडाहरूको विवरण र पार्टी सदस्यताको स्थितिबारे उल्लेख छ।
रास्वपा स्थापना यता पहिलोपटक पार्टीले ठूलो आयातनमा छलफल गर्न लागेको हो। विस्तारित बैठकमा ५१२ जना प्रतिनिधि सहभागी छन्।
यो बैठकले आगामी महाधिवेशनबारे निर्णय लिनेछ। रास्वपाले आगामी फागुन ७, ८, ९ गते पहिलो महाधिवेशन गर्ने भने पनि फागुन २१ गते चुनाव तोकिएकाले सार्न दबाब बढेको छ। सम्भवतः यस विस्तारित बैठकले महाधिवेशन सार्ने निर्णय गर्ने नेताहरूले बताएका छन्। यद्यपि तोकिएको मितिभन्दा वरै महाधिवेशन गर्नुपर्ने मत पनि रास्वपाभित्र छ।
-1746009348.jpg)
