नेपाली कांग्रेसका निवर्तमान प्रमुख सचेतक श्यामकुमार घिमिरेले विघटित प्रतिनिधि सभाका सांसदहरूको हस्ताक्षर संकलन सुरू गरेको बताएका छन्।
भदौ २७ गते प्रधानमन्त्री नियुक्त भएलगत्तै प्रधानमन्त्री सुशीला कार्कीले प्रतिनिधि सभा विघटन सिफारिस गरेकी थिइन्। उक्त सिफारिसको आधारमा राष्ट्रपति रामचन्द्र पौडेलले प्रतिनिधि सभा विघटन गरेका थिए।
सरकारले प्रतिनिधि सभा विघटन गरी फागुन २१ गतेका लागि चुनाव तोकेको छ।
विघटनअघि प्रतिनिधि सभामा कांग्रेसका ८८ जना सांसद थिए। केही सांसद भने निलम्बनमा परेका थिए।
कांग्रेसका निवर्तमान प्रमुख सचेतक श्यामकुमार घिमिरेले विघटित प्रतिनिधि सभामा रहेका पार्टीका सांसदहरूको हस्ताक्षर लिन सुरू गरिएको सेतोपाटीलाई जानकारी दिए।
‘हामीले विघटित प्रतिनिधि सभामा रहेका हाम्रा सांसदहरूको हस्ताक्षर गर्न सुरू गरेका छौं,’ उनले भने, ‘सबैको हस्ताक्षर लिएर पार्टी केन्द्रीय समितिमा बुझाउँछौं। न्यायलयको ढोका ढकढक्याउन पनि हस्ताक्षर सुरू गरिएको हो।’
कांग्रेसले प्रतिनिधि सभा विघटन असंवैधानिक भएको निष्कर्ष निकालेको छ। त्यसैले प्रतिनिधि सभा पुनर्स्थापनाका पक्षमा निवर्तमान सांसदहरूको हस्ताक्षर संकलन गर्न सुरू गरेको हो।
नेकपा (एमाले) ले पनि विघटित प्रतिनिधि सभाका आफ्ना सांसदहरूको हस्ताक्षर संकलन गरिरहेको छ। एमाले प्रतिनिधि सभा पुनर्स्थापनाका पक्षमा उभिएको छ।
कांग्रेसले भने प्रतिनिधि सभा विघटन असंवैधानिक भने पनि प्रतिनिधि सभा पुनर्स्थापना वा चुनावबारे निर्णय गरिसकेको छैन। असोज २८ गतेदेखि सुरू केन्द्रीय समितिमा धारणा राखेका केन्द्रीय सदस्यहरूमध्ये अधिकांशले चुनावमा जानुपर्ने कुरा राखेका छन्।
-1746009348.jpg)
