होटलमा मुख्मन्त्री नियुक्त र शपथ ग्रहणसमेत गराएपछि नेकपा (एमाले) को मधेस संसदीय दलमै असन्तुष्टि देखिएको छ।
एमाले मधेस संसदीय दलका सचेतक हरिनारायण महतोले होटलहोटलमा मुख्यमन्त्री पद नियुक्त गरेको घटनाले पार्टी, संसदीय दलकै उपहास भएको टिप्पणी गरे।
‘बिहानै म यो के सुन्दैछु, हाम्रो दलका नेता होटलमा मुख्यमन्त्री नियुक्त भएछन्! बर्दिबास र सिन्धुलीको सिमानामा रहेको पानस होटलमा मुख्यमन्त्री नियुक्त गर्नुपर्ने अवस्था के थियो?,’ सेतोपाटीसँगको कुराकानीमा भने, ‘यसले त पार्टी, दलकै बेइज्जत भएको छ।’
उनले संविधानको धारा १६८ (३) अनुसार नै मुख्यमन्त्री नियुक्त गर्नुपर्ने अवस्था आएको हो भने पनि छलफल आवश्यक रहेको बताए।
‘कम्तीमा पार्टी, दलभित्र छलफल गर्नुपर्छ। तर हामीलाई थाहै दिइएको छैन,’ उनले भने, ‘यसबारे दल र पार्टीभित्र छलफल हुन्छ।’
मधेस प्रदेश प्रमुख सुमित्रा सुवेदी भण्डारीले एमाले संसदीय दल नेता सरोजकुमार यादवलाई गएराति मुख्मन्त्री नियुक्त गरेको पत्र दिएकी छन्।
पूर्वमुख्यमन्त्री जितेन्द्र सोनार (सोनल)का अनुसार प्रदेश प्रमुख भण्डारी सोमबार बिहानै अस्वस्थ भएको भन्दै सोमबार उज्यालो नहुँदै काठमाडौं जाने बताएकी थिइन्।
प्रदेश प्रमुखको निवासबाट बाहिरिएकी भण्डारीले सोमबार बिहानै बर्दिबासको पानस होटलमा मुख्यमन्त्री यादवलाई नियुक्ति पत्र दिएर शपथसमेत त्यहीँ गराएकी थिइन्।
त्यही होटलमा एमाले सांसद लखन दास, नेपाल संघीय समाजवादी पार्टीकी विमला अन्सारी र राष्ट्रिय प्रजातन्त्र पार्टीका कञ्चन विच्छालाई मन्त्री नियुक्त गर्दै उनीहरूको शपथसमेत त्यहीँ भएको थियो।
पूर्वमुख्यमन्त्री सोनलले मधेश प्रदेशको जनतासँग धोका भएको प्रतिक्रिया दिएका छन्।
सामाजिक सञ्जाल फेसबुकमा मुख्यमन्त्री नियुक्त हुँदै गरेको भिडिओसहित सोनलले मधेसको अस्मिता नै समाप्त पार्ने खेलमा प्रदेश प्रमुख लागेको प्रतिक्रिया व्यक्त गरेका हुन्।
‘मधेस प्रदेशको जनतासँग धोका भयो। स्वास्थ्य उपचारको नाममा निस्केकी मधेस प्रदेशका प्रदेश प्रमुख सुमित्रा सुवेदी भण्डारीले सिन्धुली र महोत्तरीको सिमानाको एउटा होटेलमा प्रदेशको अस्मितालाई समाप्त पार्ने खेल गरिन्।’
निवर्तमान मुख्यमन्त्री सोनलले नै प्रदेश प्रमुख भण्डारीलाई जनकपुरबाट बिदाइ गरेका थिए।
मधेस प्रदेश सभामा एमालेको २५ सिटको छ।
प्रदेश सभा सदस्य रामचन्द्र मण्डल सभामुखमा नियुक्त भएका छन् भने दीपेन्द्र ठाकुर निलम्बनमा छन्। धनुषाको औरही गाउँपालकिामा १५ शैय्याको अस्पताल निर्माणका क्रममा हिनामिना गरेको आरोपमा उनी लगायत १७ जना विरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेपछि उनी निलम्बनमा परेका हुन्।
ठाकुर धनुषा निर्वाचन क्षेत्र नम्बर ३(२) बाट निर्वाचित भएका थिए।
-1746009348.jpg)
