नेकपा (एमाले)का सचिव लेखराज भट्टले वर्तमान सरकार असंवैधानिक रहेकाले यसलाई हटाउनुपर्ने बताएका छन्।
एमालेले कैलालीमा गरेको जनसभामा सचिव भट्टले संसद पुनर्स्थापना र एमाले नेतृत्वको सरकार अहिलेको आवश्यकता रहेको बताउँदै त्यसका लागि एमाले समर्थक, पार्टी सदस्य र नेता कार्यकर्ता तयार हुनुपर्ने बताएका हुन्।
अहिलेको लडाइँ राष्ट्रवाद र दलाल प्रवृत्तिबीच, क्रान्ति र प्रतिक्रान्तिबीच तथा विकास र ध्वंशका बीच रहेको पनि बताए।
'त्यसैले तपाईं हामी सबै एमालेका समर्थकहरू, पार्टी सदस्यहरू, नेता कार्यकर्ताहरू गाउँ-गाउँ जानुपर्छ। टोल-टोल जानुपर्छ। आम जनतालाई सचेत पार्नुपर्छ र यो असंवैधानिक सरकारका विरूद्ध अब आगो बाल्नुपर्छ,' उनले भने।
अब संघर्ष गरेरै अहिलेको सरकारलाई सत्ताच्यूत गर्नुपर्ने भट्टले बताए।
उनले एमाले राष्ट्रियताका निम्ति आवश्यक परे वलिदान दिन तयार हुने बताए।
'एमाले ज्यूँदो छ। त्यसले राष्ट्रियताको निम्ति, सार्वभौमिकताका निमित्त फेरि पनि आवश्यक भयो भने वलिदान गर्न तयार छ। तपाईंहरू पनि तयार हुनुपर्छ,' उनले भने।
त्यसपछि मात्रै विकास र समृद्धि आउने उनले बताए।
अहिलेको लडाईं देशलाई स्वतन्त्र राख्ने कि कसैको अधीनमा भन्ने पनि रहेको बताए।
'एमाले चाहन्छ यो देश स्वतन्त्र होस्। स्वतन्त्र रहनुपर्छ। जुनसुकै परिस्थिती आए पनि सामना गर्नुपर्छ भन्छ। एमालेमा सहि नेतृत्व छ। सहि नेतृत्व भएपछि सहि विचार पैदा हुन्छ। सही बिचारले ठीक ढंगले देशको नेतृत्व गर्न सक्छ,' उनले भने।
उनले भदौ २४ गते एमालेलाई कमजोर बनाउने षड्यन्त्रले पार्टी कार्यालय, नेता कार्यकर्ताहरु घरमा आगजनी गरेको बताए।
'तर हामी केन्द्रीय कार्यलयमा गयौं। प्रण गयौं र शोकलाई शक्तिमा बदल्छौं भन्यौं र अहिले जनतामा आएका छौं,' उनले भने।
भदौ २३ को घटनाको छानबिन गर्नका लागि पार्टी नेतृत्वले पटक पटक भनेको पनि उनले बताए।
'छानबिन भएको छैन पहिल्यै फैसला हुन्छ? हाम्रो अध्यक्षलाई उपत्यका छाड्न पाइँदैन भनिएको छ। के अपराध गर्यो नेतृत्वले? केपी ओलीले चुच्चे नक्सा बनाउनु अपराध हो?,' उनले भने।
ओलीको कट्टर आलोचकहरूले पनि उनी राष्ट्रवादी नेता स्वीकारेको सचिव भट्ट बताउँछन्।
'तर धेरै कमजोरी छ भन्नुहुन्छ। राष्ट्रवादी हुनु नै ठूलो कुरा हो। कोही आँट्न सक्छ? कमजोरीहरू गौण हुन्,' उनले भने।
-1763106181.jpg)
-1746009348.jpg)
