नेपाली कांग्रेसका कार्यवाहक सभापति पूर्णबहादुर खड्काले आज पनि केही पदाधिकारी र केही पूर्वपदाधिकारीसँग अनौपचारिक कुराकानी गर्दै सहमति जुटाउन जमर्को गरेका छन्।
शनिबार दिनभरजसो ललितपुरको कुपोन्डोलस्थित एक होटलमा बसेर कार्यवाहक सभापति खड्काले नेताहरूसँग अनौपचारिक छलफल गरेका हुन्।
कांग्रेसमा फागुन २१ को चुनावअघि नियमित वा विशेष महाधिवेशन गर्नुपर्ने र चुनावपछि मात्रै वैशाख मसान्तसम्म नियमित महाधिवेशन गर्ने भन्ने फरक फरक मत छ।
महामन्त्रीहरू गगन थापा र विश्वप्रकाश शर्माले चुनावअघि नै नियमित वा विशेष महाधिवेशन गरेर जानुपर्ने अडान राखेका छन्। नेता शेखर कोइराला पनि पुसभित्रै नियमित महाधिवेशनका पक्षमा छन्।
तर सभापति शेरबहादुर देउवा पक्षका कतिपय पदाधिकारी तथा पूर्व पदाधिकारीहरू भने पहिले चुनावमा होमिनुपर्ने र त्यसपछि मात्रै महाधिवेशन गर्नु पर्नेमा छन्। चुनावअघि गरिने महाधिवेशनले पार्टीका तल्ला संरचनासँग मतभेद ल्याउने र त्यसले चुनावमा असर पार्ने दाबी सभापति देउवापक्षका केही पदाधिकारी र पूर्वपदाधिकारीहरूको छ।
१४औं महाधिवेशनमा सभापति देउवा प्यानलमै रहेका २४ जना केन्द्रीय सदस्यहरूले भने पार्टी कार्यालयमा हस्ताक्षर सहितको पत्र बुझाउँदै चुनावअघि महाधिवेशन गर्न माग गरेका छन्।
देउवा पक्षकै २४ जना केन्द्रीय सदस्यले चुनावअघि महाधिवेशन मागेपछि देउवा पक्षका '६ भाइ' पूर्वपदाधिकारीहरूले शनिबार नयाँ बानेश्वरमा समूह भेला पनि गरेका थिए। उनीहरूले चुनावअघि नियमित वा विशेष कुनै पनि महाधिवेशन गर्न नसकिने निष्कर्ष निकालेको छलफलमा सहभागी एक नेताले जानकारी दिए।
यो छलफलमा चुनावअघि महाधिवेशन मागेका २४ जना केन्द्रीय सदस्यहरू भने उपस्थित भएका थिएनन्।
महाधिवेशनको तिथिमिति विवादले गर्दा कांग्रेसको गत असोज २८ गते सुरू केन्द्रीय समिति बैठक अहिलेसम्म कुनै पनि निर्णयमा पुग्न सकेको छैन। कार्यवाहक सभापति पूर्णबहादुर खड्काले पटक-पटक बैठक स्थगित गरी सहमतिको पहल गर्दै आएका छन्।
केन्द्रीय समितिमा नेताहरूले धारणा राख्ने क्रम सकिँदासमेत महाधिवेशनको तिथिमिति विवाद नसुल्झिएपछि केन्द्रीय समिति बैठक नै रोकेर सहमतिको प्रयास भइरहेको छ।
कार्यवाहक सभापति खड्काले सहमतिमै केन्द्रीय समितिबाट निर्णय लिनको लागि भन्दै सोमबार दिउँसो २ बजेसम्मका लागि केन्द्रीय समिति बैठक स्थगित गरेका छन् र उनले अनौपचारिक तथा औपचारिक रूपमा छलफलहरू गरिरहेका छन्।
केन्द्रीय समिति बैठकमा गत कात्तिक १८ गते महामन्त्री गगन थापाले पुस १६ गतेदेखि १९ गतेसम्म १५औं महाधिवेशन गर्न प्रस्ताव गरेका थिए। त्यो बेलासम्म क्रियाशील सदस्यता सबै टुंग्याएर महाधिवेशन गर्न सक्ने उनको भनाइ थियो। करिब नौ लाख क्रियाशील रहेको कांग्रेसमा अहिलेसम्म ६ लाखभन्दा बढीले क्रियाशील सदस्यता नवीकरण गरिसकेका छन् भने नयाँ क्रियाशील सदस्यता वितरणको काम भने सुरू भएको छैन।
क्रियाशील सदस्यता नवीकरणको सबै विवरण केन्द्रीय कार्यालयमा जिल्ला समितिहरूले पठाइसकेका पनि छैनन्। त्यसैले सभापति देउवा पक्षका केही पदाधिकारी तथा पूर्व पदाधिकारीहरूले क्रियाशील सदस्यता नवीकरण र नयाँ वितरण तथा उजुरी छानबिनमा समय लाग्ने भन्दै वैशाखमा मात्रै महाधिवेशन गर्न सकिने बताउँदै आएका छन्।
विभिन्न बहानामा नियमित महाधिवेशन गर्न नसकिने निष्कर्ष निकाल्ने हो भने अब विशेष महाधिवेशनको विकल्प नभएको केन्द्रीय समिति बैठकमै महामन्त्री गगन थापाले बताएका थिए।
२९ असोजमा प्रतिशत महाधिवेशन प्रतिनिधिहरूले कार्यवाहक सभापति खड्कालाई हस्ताक्षरसहित विशेष महाधिवेशनको माग गरेका थिए। विधान अनुसार विशेष महाधिवेशन माग भएको तीन महिनाभित्र आयोजना गर्नुपर्ने हुन्छ। विशेष महाधिवेशन बाध्यकारी रहेको भन्दै महामन्त्री थापाले मंसिर २७ र २८ गते विशेष महाधिवेशनको प्रस्ताव समेत केन्द्रीय समितिमा राखेका थिए। तर सभापति देउवा पक्षका केही पदाधिकारी तथा पूर्व पदाधिकारीहरूले नियमित वा विशेष कुनै पनि महाधिवेशन चुनावअघि गर्न नसकिने अडान राख्दै आएका छन्।
महामन्त्रीहरू गगन थापा र विश्वप्रकाश शर्मा भने चुनावअघि नियमित वा विशेष महाधिवेशन गरेरै जानुपर्ने अडानमा छन्। महाधिवेशनको तिथिमिथिबारे दुई पक्ष टसमस नभएपछि कार्यवाहक सभापति पूर्णबहादुर खड्का दबाबमा छन्।
यसबीचमा सभापति शेरबहादुर देउवा सिंगापुरमा उपचार गरी स्वदेश फर्केका छन्। सभापति देउवा दम्पतीलाई स्वागतका लागि कार्यवाहक सभापति खड्का र प्रवक्ता प्रकाशशरण महत शुक्रबार बेलुकी त्रिभुवन अन्तर्राष्ट्रिय विमानस्थल पुगेका थिए।
कांग्रेसका एक पदाधिकारीले दिएको जानकारी अनुसार कार्यवाहक सभापति खड्काले सभापति शेरबहादुर देउवासँग केन्द्रीय समितिमा उठेका विषयवस्तुबारे र समसामयिक राजनीतिक घटनाक्रमबारे जानकारी गराउने गरी भेटघाटसमेत गरिसकेका छन्। सभापति देउवासँग कुराकानीपछि कार्यवाहक सभापति खड्काले दुवै पक्षका नेताहरूसँग `वान टु वान´ छलफल गरेका हुन्।
स्रोतका अनुसार आजको कुराकानीमा पनि पूर्व पदाधिकारीहरू विमलेन्द्र निधि र कृष्णप्रसाद सिटौलाले अरू पार्टीको भन्दा कांग्रेसको अवस्था फरक रहेकोले महाधिवेशन भन्दा चुनावमै केन्द्रित हुनुपर्ने दोहोर्याएका थिए।
कार्यवाहक सभापति खड्कासँगको छलफलमा महामन्त्री थापा र शर्माले भने नियमित महाधिवेशन नभए विशेष महाधिवेशन विधानअनुसार भइ छोड्ने बताएका थिए।
प्रचार विभाग प्रमुख मीनबहादुर विश्वकर्माले कार्यवाहक सभापतिले गरेका औपचारिक र अनौपचारिक छलफल सकारात्मक रहेको र केन्द्रीय समितिबाट सर्वसम्मत निर्णय गरिने बताए।
'हिजो केन्द्रीय कार्यसम्पादन समिति बैठक बसेको थियो। हामीले कार्यवाहक सभापतिज्यूलाई सहमतिको एउटा प्रस्ताव ल्याउन भनेका छौं,' उनले सेतोपाटीसँग भने, 'आज कार्यवाहक सभापतिज्यूले नेताहरूसँग `वान टू वान´ छलफल गर्नुभएको छ। छलफल सकारात्मक छन्, हामी सर्वसम्मत रुपमा केन्द्रीय समितिबाट निर्णयमै पुग्छौं।'
केन्द्रीय समिति बैठक सोमबार दिउँसो २ बजे बस्नेछ। त्यसअघिसम्म कार्यवाहक सभापति खड्काले सहमतिका लागि नेताहरूसँग कुराकानी गर्नेछन्।
एक महिनासम्म केन्द्रीय समिति बैठक बसे पनि कुनै पनि निर्णयमा पुग्न नसकेको भन्दै नेतृत्वको आलोचना भइरहेको छ। त्यसप्रति लक्ष्य गर्दै कार्यवाहक सभापति खड्काले केही समय लागे पनि सर्वसम्मत रूपमा निर्णयमा पुगिने प्रतिक्रिया दिएका छन्।
'इतिहासमै देश र पार्टीमाथि देखिएको प्रतिकूल अवस्थालाई ध्यानमा राखेर निर्णय गर्न केही समय ढिला भए पनि हतारमा निर्णय गरेर पछि पछुताउनुभन्दा पार्टीलाई एकताबद्ध राखेर प्रतिकूल समयको पदचाप सामना गर्न, हाम्रा विगतका गल्ती-कमजोरी स्विकारी नेपाली जनतासँग माफी मागेर, विगतमा जस्तै समाधानको नेतृत्व फेरि एकपटक कांग्रेसले लिन सक्ने गरी पार्टीको उपयुक्त निर्णय गर्न समय लागेको छ,' कार्यवाहक सभापति खड्काको भनाइ छ।
उनले पार्टीलाई एकताबद्ध राखेर प्रतिकूल समयको पदचाप सामना गर्न सक्ने निर्णय गर्न केही समय लागेकाले धैर्य गर्न पनि अपिल गरेका छन्।
-1763106181.jpg)
-1746009348.jpg)
