नेपाली कांग्रेसका सभापति शेरबहादुर देउवा पुन: सक्रिय भएका छन्।
थप उपचार गरी सिंगापुर गएका देउवा कात्तिक २८ गते स्वदेश फर्केका थिए।
स्वदेश फर्केपछि सभापति देउवाले पार्टीभित्रका मतभेद समाधान गर्न पहल थालेका हुन्।
सभापति देउवाले शनिबार साँझ आफूनिकट केही पदाधिकारी र केही केन्द्रीय सदस्यहरूसँग भेटेका थिए।
साथै सभापति देउवाले आज महामन्त्री विश्वप्रकाश शर्मासँग भेटेका छन्।
नेताहरूसँग भेटका क्रममा सभापति देउवाले पार्टीलाई एकताबद्ध बनाएर लैजानुपर्ने बताउने गरेका छन्।
‘सभापतिज्यूले नेताहरूसँग भेट गर्नुभएको छ,’ प्रवक्ता प्रकाशशरण महतले सेतोपाटीसँग भने, ‘एकताबद्ध भएर चुनावमा लाग्नुपर्छ भन्ने कुरा उहाँको छ।’
महाधिवेशन तिथिमितिलगायत विषयमा भने कार्यवाहक सभापति पूर्णबहादुर खड्काले नै नेताहरूसँग छलफल गरेर सहमति खोज्ने प्रयास गरिरहेका छन्।
पुसभित्र क्रियाशील सदस्यताको टुंगो लगाएर चुनावपछि वैशाखमा १५ औं महाधिवेशन गरेर जानुपर्ने कुरा आफूहरूले सभापति देउवासमक्ष राखेको प्रवक्ता महत बताउँछन्।
सभापति देउवाले कार्यवाहक सभापतिलाई सबैले सहयोग गर्न र सर्वसम्मत रूपमा केन्द्रीय समितिबाट निर्णय लिन पनि आग्रह गरेका छन्।
सभापति देउवाले असोज २८ गते केन्द्रीय समितिमा उपस्थित भएर उपसभापति खड्कालाई कार्यवाहक सभापतिको जिम्मेवारी दिएका थिए।
सिंगापुरबाट फर्केपछि सभापति देउवा र उपसभापति खड्काबीच पार्टीका आन्तरिक विषय र समसायमिक राजनीतिक घटनाक्रमबारे छलफल भएको भइसकेको छ।
जेनजी आन्दोलनका क्रममा भदौ २४ गते सभापति देउवा दम्पतीमाथि प्रदर्शनकारीहरूले आक्रमण गरी घाइते बनाएका थिए।
कांग्रेसभित्र एक महिनासम्म केन्द्रीय समितिमा नेताहरूले धारणा राखे पनि कुनै पनि निर्णय निस्कन सकेको छैन।
केन्द्रीय समिति बैठक सोमबार दिउँसोका लागि बोलाइएको छ। त्यसअघि सहमति खोज्न सभापति देउवा र कार्यवाहक सभापति खड्काले पहल गरिरहेका छन्।
चुनावअघि महाधिवेशन गर्ने कि नगर्ने भन्नेमा मुख्य मतभेद छ।
५४ प्रतिशत महाधिवेशन प्रतिनिधिहरूले विशेष महाधिवेशन माग गरेर असोज २९ गते नै कार्यवाहक सभापतिलाई हस्ताक्षर बुझाएकोले त्यसअनुसार प्रक्रिया सुरू गर्नुपर्ने मागसमेत उठिरहेको छ।
यस्तो अवस्थामा सभापति देउवा पुन: सक्रिय भएका हुन्। उनले सहमतिमै निर्णय लिन नेताहरूसँग छलफल गरेका हुन्।
निवर्तमान प्रतिनिधि सभा सांसदहरूले प्रतिनिधि सभा पुनर्स्थापनाका पक्षमा हस्ताक्षर चलाए पनि सभापति देउवा भने चुनावकै पक्षमा देखिएका छन्।
सरकारले फागुन २१ गते प्रतिनिधि सभा चुनाव तोकेको छ। त्यसअघि माघ ११ गते राष्ट्रिय सभा चुनाव छ। यी दुई चुनावलाई मध्यनजर गर्दै त्यसको तयारी थाल्न पनि अहिले महाधिवेशन गर्न नसकिने सभापति देउवा पक्षका केही पदाधिकारी र केही पूर्वपदाधिकारी छन्।
तर महामन्त्री गगन थापा र विश्वप्रकाश शर्मा चुनावअघि नियमित वा विशेष जे भए पनि महाधिवेशन हुने पक्षमा छन्।
-1763106181.jpg)
-1746009348.jpg)
