नेकपा (एमाले) का अध्यक्ष केपी शर्मा ओलीले वर्तमान सरकार कसको र कसले बनाएको भन्ने नै स्पष्ट नभएको बताएका छन्।
प्रेस चौतारी नेपालको टिमसँग आफ्नै निवास भक्तपुरको गुण्डुमा आइतबार बिहान छलफल गर्दै अध्यक्ष ओलीले कार्की नेतृत्वको सरकार कसको हो भनेर यकिन नै हुन नसकेको बताएका हुन्।
‘यो सरकार कसको प्रतिनिधि हो? जेन जीले मेरो सरकार होइन भन्छ। दलले हाम्रो सरकार होइन भन्छन्। संसदले यसलाई म चिन्दिनँ भन्छ। संविधानले मसँग यस्तो सरकार बनाउने व्यवस्थै छैन भन्छ,’ अध्यक्ष ओलीले प्रश्न गरे, ‘आखिर यो सरकार कसको हो?’
बेवारिसे सरकारले तोडफोड र आगलागीमा संलग्नलाई कारबाही नगरेर दण्डहीनतालाई प्रश्रय दिएको बताए।
यस प्रकारका अपराधी पक्राउ नपर्नु र निर्दोषलाई पक्रन, स्थान हद गर्न सरकार विभिन्न समूहका नाममा माग पत्र, ज्ञापन पत्र बुझाउनुमा पनि सरकारकै हात रहेको अध्यक्ष ओलीको भनाइ छ।
‘विभिन्न नामका समूह खडा गरेर कहिले २४ गतेका विध्वंशकारीलाई पक्रन हुँदैन भन्ने ज्ञापन पत्र बुझाउन लगाएको छ। कहिले केपी ओली र रमेश लेखकलाई पक्राउ गर्नुपर्यो भन्न लगाएको छ,’ अध्यक्ष ओलीले भने, ‘यो कुनै जेन जी समूहले गरेको होइन। सरकारले आफै यस्ता समूह खडा गरेर, आफै ज्ञापन पत्रको ड्राफ्ट बनाएर बुझाउन लगाएको नाटक हो।’
यस्ता ड्राफ्ट कहाँ बने र कसले बनायो भन्ने कुराको अभिलेख पनि आफूहरूसँग भएको उनले बताए।
गृहमन्त्रीले भदौ २४ गतेका घटनाका अपराधीलाई पक्राउ नगर्न निर्देशन दिनुले देशमा दण्डहिनतालाई प्रश्रय दिएको उनको भनाइ छ ।
अध्यक्ष ओलीले मुलुकको अनिश्चयलाई सही बाटोमा ल्याउन संसद पुनः स्थापनामात्र विकल्प भएको बताएका छन्।
‘असंवैधानिक र अनधिकृत रूपबाट विघटन गरिएको संसदलाई पुनःस्थापना गरेर मात्र देशलाई सही बाटोमा हिँडाउन सकिन्छ,’ अध्यक्ष ओलीले भने, ‘यदि यस्तै असंवैधानिक तरिकाले संसदलाई विघटन गर्दै जाने हो भने नजिर बस्छ। जसले देशलाई संवैधानिक बाटोमा फर्कन अवरोध गर्दछ। त्यसकारण यो कोर्स अहिले नै करेक्सन गर्नु पर्दछ।’
संसद विघटनलाई सिंगो देशले नै अस्वीकार गरको उनले बताए।
‘अहिलेको संसद विघटनलाई सिंगो देशले अस्वीकार गरेको छ। सबै वडाहरूले अस्वीकार गरेका छन्। पालिकाहरूले अस्वीकार गरेका छन्। जिल्लाहरूले अस्वीकार गरेका छन्,’ अध्यक्ष ओलीले भने, ‘त्यसको प्रमाणको रुपमा एमाले वडामा उल्लेख्य जनताको सहभागितामा भएका भेला, पालिकाका जनप्रदर्शन र हिजो देशैभर भएका जनसभालाई हेर्न सकिन्छ। एमालेले सञ्चालन गरेका यी कार्यक्रममा ठूलो संख्यामा जनता उर्लिएर अहिलेको सरकार र यसका कदमलाई अस्वीकृत गरिसके।’
अध्यक्ष ओलीले वर्तमान सरकारले प्रेस स्वतन्त्रतालाई पञ्चायतकालिन अवस्थामा पुर्याएको बताए।
‘पञ्चायतकालमा संविधानमा नै प्रेस स्वतन्त्रता थिएन। अहिले संविधानमा त प्रेस स्वतन्त्रता छ तर अहिले व्यवहारमा छैन,’ प्रेस चौतारीको टिमसँग अध्यक्ष ओलीले भने, ‘सेल्फ सेन्सरसिप लागू भएको छ। पत्रकारले आफूले देखेको, अनुसन्धान गरेका विषय सहजै लेखेमा उनीहरुमा सरकारबाट खतरा छ। त्यसैले सेल्फसेन्सरसिपको मार पत्रकारले खेपिरहेका छन्।’
-1763106181.jpg)
-1746009348.jpg)
