नेकपा एमालेको जारी ११औं महाधिवेशनअन्तर्गत पुस १ गते मतदान हुने गरी निर्वाचन तालिका सार्वजनिक भएपछि अध्यक्ष दाबेदार केपी शर्मा ओली र ईश्वर पोखरेल दुवै समूह आफ्नो पदाधिकारीको नाम टुंगो लगाउन आन्तरिक छलफलमा जुटेका छन्।
ओली समूह भक्तपुरको गुन्डुस्थित ओली निवासमा छलफल गरिरहेको छ भने पोखरेल समूहले थापागाउँ कार्यालयमा छलफललाई तीव्रता दिइरहेको छ।
ओली समूहतर्फ पदाधिकारीका आकांक्षी धेरै भएकाले कुन पद कसलाई दिने भनी टुंगो लगाउन धेरै कसरत गर्नुपरेको छ।
पद व्यवस्थापनको समस्याकै कारण ओलीले विधान संशोधन गरी पदाधिकारी संख्या बढाउने प्रस्ताव केन्द्रीय कमिटीबाट पास गराएका छन्।
आइतबार बन्द सत्रअघि बसेको केन्द्रीय कमिटी बैठकले वरिष्ठ उपाध्यक्ष पद हटाउने तथा अध्यक्ष १ जना, उपाध्यक्ष ५, महासचिव १, उपमहासचिव ३ र सचिव ९ जनासहित ३ सय १ सदस्यीय केन्द्रीय कमिटी बनाउने निर्णय गरेको थियो।
यसले आकांक्षीहरूलाई पद बाँडफाँट गर्न केही सहज भए पनि सबैले रोजेको पद पाउने सम्भावना अझै छैन।
गुन्डुमा जारी छलफलमा सहभागी एक नेताका अनुसार अहिलेसम्मको छलफलमा पाँच जना उपाध्यक्षमध्ये विष्णु पौडेल, रामबहादुर थापा 'बादल', गुरू बराल र पृथ्वीसुब्बा गुरूङको नाम लगभग फाइनल भइसकेको छ।
एक जना उपाध्यक्ष पदमा प्रदीप ज्ञवाली वा शंकर पोखरेललाई ल्याउन सक्ने सम्भावना रहेको ओली समूहका एक सदस्यले बताए।
उपाध्यक्ष संख्या थपिएपछि लालबाबु पण्डितले पनि आकांक्षा व्यक्त गरेका छन्। तर उनलाई अनुशासन आयोगको प्रमुख बनाउने ओलीको तयारी रहेको स्रोत बताउँछ।
त्यस्तै, महासचिव पदमा अहिलेका महासचिव शंकर पोखरेलले दाबी छाडेका छैनन्। अहिलेका उपमहासचिव प्रदीप ज्ञवालीले पनि यसपालि महासचिव बन्ने आकांक्षा व्यक्त गरिरहेका छन्। पहिले पृथ्वीसुब्बा गुरूङ पनि महासचिवका आकांक्षी थिए।
अहिले पृथ्वीसुब्बालाई उपाध्यक्षमा लैजानेबारे करिब करिब टुंगो लागिसकेको छ। बाँकी रहेका शंकर पोखरेल र प्रदीप ज्ञवालीमध्ये ओलीको रोजाइ पोखरेल हुन्। यसका लागि ज्ञवालीलाई उपाध्यक्षमा सेट गराउने ओलीको तयारी छ। ज्ञवाली उपाध्यक्ष बस्न मानेनन् भने उनलाई महासचिव बनाएर पोखरेललाई नै उपाध्यक्ष बनाइन सक्ने स्रोत बताउँछ।
उपमहासचिवतर्फ तीन जना निर्वाचित हुनेमा रघुवीर महासेठ, विष्णु रिमाल र पद्मा अर्यालको नाम लगभग टुंगो लागिसकेको स्रोत बताउँछ।
आइतबारको केन्द्रीय कमिटीले सचिव संख्या ५ बाट बढाएर ९ पुर्याएको छ। ती ९ जना सचिवमा कोशी प्रदेशबाट हिक्मत कार्की, शेरधन राई र भानुभक्त ढकाल आकांक्षी छन्। यीमध्ये शेरधन र भानुभक्तको बलियो सम्भावना छ।
मधेस प्रदेशबाट ज्वालाकुमारी साह सचिव हुन सक्छिन्।
बाग्मती प्रदेशबाट महेश बस्नेत र राजन भट्टराईमध्ये कुनै एक वा दुवै सचिव हुन सक्छन्। एक जना मात्र भए बस्नेतको सम्भावना बलियो छ।
त्यस्तै, गण्डकी प्रदेशबाट जगत विश्वकर्मा र खगराज अधिकारी आकांक्षी देखिएका छन्। यीमध्ये खगराजको सम्भावना बलियो रहेको स्रोत बताउँछ।
लुम्बिनीबाट छविलाल विश्वकर्मा, कर्णालीबाट यमलाल कँडेल र सुदूरपश्चिमबाट लेखराज भट्ट सचिव हुने सम्भावना प्रबल छ।
अर्कातिर पोखरेल समूहमा पदाधिकारी संख्या बढेपछि उम्मेदवारी छान्न खासै धेरै कसरत गर्नुपर्ने देखिँदैन। यो समूहमा पहिले नै आकांक्षी कम थिए। त्यसमाथि पदाधिकारी संख्या बढेपछि व्यवस्थापन गर्न सहज हुने पोखरेल समूहका एक नेताले बताए।
यहाँ महासचिवमा सुरेन्द्र पाण्डेकै सम्भावना बलियो छ भने अर्का आकांक्षी गोकर्ण विष्टलाई उपाध्यक्षमा सेट गराउने लगभग तय भएको छ।
पदाधिकारी संख्या बढेपछि पोखरेल समूह ओलीतर्फका असन्तुष्ट नेतालाई पनि आफूतिर तान्ने तयारीमा लागेको छ। एक नेताले बताएअनुसार आजभोलि नै ओली पक्षका केही नेता खुल्ने प्रबल सम्भावना छ।
पोखरेल समूहमा अहिलेसम्म योगेश भट्टराईको टुंगो लागेको छ। उनी उपमहासचिव उठ्ने पक्कापक्की भएको छ।
सचिवतर्फ गोकुल बाँस्कोटा, ठाकुर गैरे, कर्ण थापा, विनोद ढकाल, विन्दा पाण्डे लगायत आकांक्षी छन्।
-1765620488.jpg)
-1763886130.jpeg)
-1746009348.jpg)
