राष्ट्रिय स्वतन्त्र पार्टी (रास्वपा) ले फागुन २१ गते हुने निर्वाचनका लागि समानुपातिकको सूचीमा परेकाहरूसँग शुक्रबार र शनिबार छलफल गर्ने भएको छ।
छलफल र घरदैलो काठमाडौं र बागमती प्रदेशमै हुने राष्ट्रिय स्वतन्त्र पार्टीले जानकारी दिएको छ।
‘राष्ट्रिय स्वतन्त्र पार्टीको मंसिर २५ गते बसेको पार्टी सचिवालय बैठकले ‘पार्टी एकीकरण प्रक्रियाबाट जोडिएका सदस्यहरूको प्राकृतिक आवश्यकता, उच्च संवाद समितिको तर्फबाट भइरहेको सम्भाव्य सहकार्य एवं एकता साथै जेन–जी अगुवा र सरकारका बीच भएको सम्झौता समेतलाई ध्यानमा राखी आसन्न प्रतिनिधिसभा सदस्य निर्वाचनका लागि पार्टीको समानुपातिकतर्फको उम्मेदवारी दिने म्याद आगामी पुस ५ गतेसम्मका लागि थप गर्ने निर्णय गरेको थियो। त्यो परिप्रेक्ष्यमा, आज र भोलिसम्म उम्मेदवारी दिने व्यक्तिहरूको हकमा उम्मेदवारहरूसँग छलफल र घरदैलो काठमाडौं र बागमती प्रदेशमै हुनेछ,’ रास्वपाले भनेको छ।
पहिलो चरणको प्रारम्भिक उम्मेदवारहरूको नामावली प्रकाशन भएसँगै उनीहरूमाथि दाबी–विरोध पनि स्वतः सुरु भएको रास्वपाले जानकारी दिएको छ।
उम्मेदवारमाथि दाबी–विरोध सम्बन्धित प्रदेशका सभापति, पार्टी निर्वाचन आयोग, केन्द्रीय कार्यालय वा पार्टीको इमेलमार्फत सिधै गर्न सकिने रास्वपाले जनाएको छ।
निर्वाचन आयोग नेपालले क्लस्टरको कम्पोजिसनको अध्ययन गरिरहेको अवस्थामा अन्तिम बन्द सूचीको क्लस्टर कम्पोजिसन निर्वाचन आयोग नेपालले तोकेबमोजिम नै हुने रास्वपाले बताएको छ। पार्टीको आन्तरिक उम्मेदवार छनोट प्रक्रियाका विभिन्न अवयव निर्वाचन आयोग नेपालले गर्ने निर्णयमा निहित रहनेछ।
-1746009348.jpg)
