गत वर्षको विद्यार्थी आन्दोलनसँग जोडिएका बंगलादेशका विद्यार्थी नेता शरीफ उस्मान हादीको मृत्यु भएपछि बिहीबार राजधानी ढाकाका धेरै क्षेत्रमा हिंसा भड्किएको छ।
हादीलाई गत शुक्रबार ढाकाको एक मस्जिदबाट निस्कँदै गर्दा गोली हानिएको थियो। गोली टाउकोमा लागेपछि उनी गम्भीर घाइते भएका थिए।
त्यसपछि उनलाई डिसेम्बर १५ मा एयरलिफ्ट गरेर उपचार निम्ति सिंगापुर लगिएको थियो, जहाँ बिहीबार उनको मृत्यु भयो।
गत वर्ष अगस्टमा बंगलादेशकी पूर्वप्रधानमन्त्री शेख हसिनाविरूद्ध भएको विद्यार्थी आन्दोलनका प्रमुख अनुहारमध्ये उनी एक थिए।
उनी शेख हसिनाविरोधी इंकलाब मञ्चका सदस्य थिए। फेब्रुअरीमा हुने चुनावका लागि उनी पनि सम्भावित उम्मेदवार थिए र आक्रमणको समय ढाका–८ सिटबाट स्वतन्त्र उम्मेदवारका रूपमा प्रचार गरिरहेका थिए।
इंकलाब मञ्च गत वर्ष जुलाईमा भएको बंगलादेश विद्यार्थी आन्दोलन क्रममा चर्चामा आएको थियो। यो समूहलाई कट्टरपन्थी संगठन भनिएको छ र यसले अवामी लिगलाई कमजोर पार्ने प्रयासहरूमा अग्रसर भूमिका खेलेको छ।
विद्यार्थी आन्दोलनमा भूमिका भए पनि मोहम्मद युनुस सरकारले उक्त मञ्च विघटन गरेको थियो र राष्ट्रिय चुनाव लड्न प्रतिबन्ध लगाएको थियो।
अन्तर्राष्ट्रिय समाचार संस्था बिबिसीका अनुसार हादीको निधनको खबर फैलिएसँगै ढाकाका धानमन्डी, शाहबागसहित विभिन्न स्थानमा विरोध प्रदर्शन, तोडफोड र आगजनीका घटना भएका छन्।
भीडले बिहीबार रातभर ढाकाका विभिन्न स्थानमा आक्रमण गरेको छ। यसमा बंगलादेशका दुई प्रमुख अखबारका कार्यालय पनि परेका छन्।
उनीहरूले 'प्रोथोम आलो' र 'द डेली स्टार' अखबारका कार्यालय, धानमन्डी-३२ स्थित शेख मुजीबको घर र छायानट संस्कृति भवनमा आक्रमण गरी आगजनी र तोडफोड गरे।
यस अतिरिक्त चटगाँव, राजशाही र अन्य धेरै क्षेत्रमा पनि विभिन्न स्थानमा आक्रमण भएका छन्। भारतीय सहायक उच्चायुक्तको निवास अगाडि ठूलो संख्यामा मानिसहरू जम्मा भएका थिए। स्थानीय पत्रकारहरूले बताएअनुसार भीडले उच्चायोगमाथि ढुंगामुढा गरेको छ।
यसका साथै अपदस्थ अवामी लिग सरकारका पूर्वशिक्षामन्त्री मोहिबुल हसन चौधरी नौफेलको घरमा तोडफोड गरियो र आगो लगाइयो।
बंगलादेशको अन्तरिम सरकारका प्रमुख सल्लाहकार मोहम्मद युनुसले बिहीबार राति ११:२० बजे राष्ट्रका नाममा सम्बोधन गर्दै जनतालाई धैर्य राख्न आग्रह गरे र कुनै पनि प्रकारका 'प्रचार र अफवाह' मा ध्यान नदिन तथा हतारमा निर्णय नगर्न अनुरोध गरे।
युनुसले हत्यामा संलग्न सबैलाई यथाशीघ्र न्यायको कठघरामा ल्याइने र उनीहरूलाई अधिकतम सजाय दिलाइने बताए। उनले मृतक हादीकी पत्नी र एक मात्र सन्तानको जिम्मेवारी सरकारले लिने जानकारी पनि दिए।
मोहम्मद युनुसले शनिबार एक दिनको राजकीय शोक घोषणा गरेका छन्।
उता, इंकलाब मञ्चले फेसबुक पोस्टमार्फत उस्मान हादीका आफन्तले शुक्रबार उनको शव सिंगापुरबाट बंगलादेश ल्याउने जानकारी दिएको छ।
सिंगापुरको विदेश मन्त्रालयले विज्ञप्ति जारी गरी 'सिंगापुर जनरल अस्पताल र नेसनल न्युरो साइन्स इन्स्टिच्युटका चिकित्सकको पूर्ण प्रयासका बाबजुद हादीको मृत्यु भएको' उल्लेख गरेको छ।
सिंगापुर प्रशासनले उस्मान हादीको शव ढाका पठाउन सिंगापुरस्थित बंगलादेश उच्चायोगलाई सहयोग गरिरहेको जनाएको छ।
बंगलादेश नेसनलिस्ट पार्टी (बिएनपी) का कार्यवाहक अध्यक्ष तारिक रहमान, जमात–ए–इस्लामी र एनसिपी (नेसनल सिटिजन्स पार्टी) सहित विभिन्न दलका नेताले हादीको निधनमा शोक व्यक्त गरेका छन्।
-1746009348.jpg)
