आगामी फागुन २१ गतेका लागि तोकिएको प्रतिनिधि सभा सदस्य निर्वाचनका लागि राष्ट्रिय स्वतन्त्र पार्टी (रास्वपा) ले माग गरेको समानुपातिक उम्मेदवारका लागि लुम्बिनी प्रदेशबाट ४४ जनाले आवेदन हालेका छन्।
रास्वपाले समानुपातिक उम्मेदवार बन्न इच्छुक पार्टीका नेता तथा कार्यकर्ताहरूलाई आवेदन दिन पुस ३ गतेसम्मको समय दिएको थियो। जसमध्ये देशभरबाट ३५२ जनाले आवेदन दिएकोमा लुम्बिनी प्रदेशका ४४ जना छन्।
रास्वपाले सार्वजनिक गरेको समानुपातिक तर्फको उम्मेदवार बन्न इच्छुक सदस्यहरूको सूचीमा लुम्बिनी प्रदेशबाट यसअघि रूपन्देही क्षेत्र नंं ३ मा हुने भनिएको उपनिर्वाचनमा उम्मेदवार लागि आवेदन भरेका ज्ञानु पौडेल र पुनम कुमारी अग्रवाल सहित केन्द्रीय सदस्य क्रान्तिशिखा धितालसम्म छन्।
त्यस्तै, २०७४ सालमा जनता समाजवादी पार्टीबाट समानुपातिक तर्फबाट लुम्बिनी प्रदेश सभा सदस्य हुँदै शंकर पोखरेल नेतृत्वको सरकारमा प्रदेशको उद्योग, वन तथा वातावरण मन्त्री बनेकी कल्पना पाण्डे पनि रास्वपाबाट समानुपातिक तर्फको उम्मेदवार बन्ने इच्छुकको सूचीमा छन्।
प्रदेश सभा सदस्यको पहिलो कार्यकाल पूरा भएपछि नै जनता समाजवादी पार्टीमा निष्क्रिय जस्तै बनेकी पाण्डे पछिल्लो समय रास्वपा प्रवेश गरेकी थिइन्। रास्वपाका लुम्बिनी प्रदेश प्रचार विभाग प्रमुख महेन्द्रप्रसाद उपाध्याय पनि समानुपातिक तर्फको इच्छुकको सूचीमा छन्।
रास्वपाले सार्वजनिक गरेको सूची अनुसार रूपन्देहीबाट मात्रै १० जनाले समानुपातिक सदस्यका लागि आवेदन भरेका छन्।
त्यस्तै, बाँकेबाट ७, दाङ र कपिलवस्तुबाट ६/६ जना तथा नवलपरासी पश्चिम र अर्घाखाँचीबाट ४/४ जनाले आवेदन दिएका छन्।
त्यसैगरी, आवेदन दिनेहरूमा बर्दियाबाट ३, प्युठानबाट २ तथा रोल्पा र गुल्मीबाट १/१ जनाले आवेदन दिएका छन्।
१२ वटा जिल्ला रहेको लुम्बिनी प्रदेशमा रूकुम पूर्व र पाल्पाबाट भने कसैले पनि आवेदन हालेका छैनन्।
रास्वपाले फागुन २१ गते हुन गइरहेको प्रतिनिधि सभा सदस्य निर्वाचन अन्तर्गत समानुपातिक उम्मेदवार बन्न चाहनेहरूका लागि गत मंसिर २१ गते आवेदन माग गरेको थियो। यसरी आवेदन माग गर्दा रास्वपाले प्रति व्यक्ति २५ हजार शुल्क समेत तोकेको थियो।
यसरी माग गरिए अनुसार लुम्बिनी प्रदेशबाट आवेदन भरेकाहरूसँग रास्वपाले भोलि शनिबार छलफल गर्दैछ।
शनिबार बिहान ११ बजे दाङको लमहीमा छलफल गरेपछि पुस ६ गतेदेखि ११ गतेसम्म ‘लिडरसिप एकेडेमी र पोलिटिकल प्रोक्सिमिटी’ को मापन र प्रारम्भिक चुनाव गरी पुस १४ गतेसम्म अन्तिम उम्मेदवार नामावली प्रकाशन गर्ने रास्वपाले जनाएको छ।
-1746009348.jpg)
