अमेरिकी राष्ट्रपति डोनाल्ड ट्रम्पले पछिल्लो समय विभिन्न देशका नागरिकलाई अमेरिका प्रवेशमा रोक लगाउने निर्णय गरेका छन्। तीमध्ये दुइटा देशले उक्त अमेरिकी निर्णयको जबाफ फर्काएको छ।
माली र बुर्किना फासोले अमेरिकी नागरिकलाई आफ्नो देश प्रवेश गर्न प्रतिबन्ध लगाउने घोषणा गरेको बेलायती सञ्चार माध्यम 'गार्डियन' ले जनाएको छ।
यी दुवै पश्चिम अफ्रिकी देशका विदेशमन्त्रीले मंगलबार छुट्टाछुट्टै विज्ञप्ति जारी गर्दै यस्तो घोषणा गरेका हुन्।
पश्चिम अफ्रिकाका सैन्य सरकार र अमेरिकाबीच तिक्त हुँदै गएको सम्बन्धका कारण त्यहाँका नागरिकलाई अमेरिका प्रवेशमा रोक लगाउने क्रम बढेको छ।
ट्रम्पले डिसेम्बर १६ मा पहिलेको यात्रा प्रतिबन्ध विस्तार गर्दै माली, बुर्किना फासो, नाइजरसहित २० थप देशलाई सूचीमा समावेश गरेका थिए।
यी देशहरू हाल सैन्य शासकद्वारा चलाइएका छन् र पश्चिम अफ्रिकी राष्ट्रहरूको आर्थिक समुदायबाट अलग हुँदै छुट्टै समूह गठन गरेका छन्।
मालीको विदेश मन्त्रालयले जारी गरेको बयानमा भनिएको छ, 'पारस्परिकताको सिद्धान्त अनुसार माली गणतन्त्र सरकारले अमेरिकी नागरिकहरूलाई पनि त्यही सर्त लागू गर्नेछ, जुन माली नागरिकहरूलाई अमेरिकामा प्रवेशमा लगाइएका छन्।'
बुर्किना फासोका विदेशमन्त्री करामोको जिन–मारी ट्राओरेले हस्ताक्षर गरेको अर्को विज्ञप्तिमा पनि अमेरिकी नागरिकमाथि प्रवेश प्रतिबन्ध लागू गरिएको जनाइएको छ।
अमेरिकी ह्वाइट हाउसले जारी गरेको वक्तव्यमा सशस्त्र समूहका निरन्तर आक्रमण र ती देशको सुरक्षा अवस्थालाई प्रतिबन्धको एक मुख्य कारण भनिएको छ।
अमेरिकाले यात्रा प्रतिबन्ध विस्तार गर्नुमा नोभेम्बर २६ मा वासिङ्टन डिसीमा दुई नेसनल गार्डमाथि भएको गोलीकाण्ड मुख्य कारण बताइएको छ।
ट्रम्प प्रशासनले उक्त घटनालाई अवैध आप्रवासी नियन्त्रण थप कडा पार्न उदाहरणका रूपमा प्रस्तुत गरेको छ।
प्रतिबन्ध घोषणा गर्दै अमेरिकी अधिकारीहरूले भनेका थिए, 'सुरक्षा जोखिम मूल्यांकन गर्न पर्याप्त जानकारी नभएका वैदेशिक नागरिकको प्रवेश रोक्न यो आवश्यक थियो। अमेरिकी जनताको सुरक्षाका लागि काम गर्नु राष्ट्रपतिको कर्तव्य हो।'
माली र बुर्किना फासो दुवै देश वर्षौंदेखि फैलिएको सशस्त्र समूहलाई नियन्त्रणमा राख्न संघर्षरत छन्।
नागरिक सरकारलाई अपदस्थ गरी सत्ता सम्हालेका त्यहाँका सैन्य नेताहरूले स्थिरता र सुरक्षा पुनर्स्थापना गर्ने प्रतिबद्धता व्यक्त गर्दै विद्रोही समूहसँग लडाइँ जारी राख्ने बताएका छन्।
-1746009348.jpg)
