नेपाली कांग्रेसको दोस्रो विशेष महाधिवेशन आइतबारबाट काठमाडौंको भृकुटीमण्डपमा सुरू हुँदैछ।
महाधिवेशनमा सहभागी हुन देशभरबाट आएका प्रतिनिधिहरूको उपस्थिति भृकुटीमण्डपमा बढ्दैछ। उनीहरू अहिले विशेष महाधिवेशनका लागि आफ्नो नाम दर्ता गराइरहेका छन्।
देशभरबाट कुल ४ हजार ७ सय ४३ जना महाधिवेशन प्रतिनिधि छन्। सात वटै प्रदेशका लागि छुट्टाछुट्टै डेस्क बनाएर दर्ता प्रक्रिया सञ्चालन गरिएको छ। अहिले पनि यहाँ नाम दर्ता गराउनेहरूको लामो लाइन देखिन्छ।
विशेष महाधिवेशन उद्घाटनअघि विभिन्न ठाउँबाट जुलुस आउने क्रम सुरू भइसकेको छ। महाधिवेशन आयोजक समितिका अनुसार ६ ठाउँबाट जुलुस निकालिँदैछ भने मध्याह्न १२ बजे उद्घाटन सत्र सुरू हुनेछ।
सबै रूटबाट बिहान ११ बजे जुलुस निस्कने कार्यक्रम तय गरिएको सचिवालयले जनाएको छ। जुलुस ललितपुरको कुपण्डोल तथा काठमाडौंका सुन्धारा, रत्नपार्क, पद्मकन्या क्याम्पसचोक, शंकरदेव क्याम्पस र कमलपोखरीबाट भृकुटीमण्डपतर्फ प्रस्थान गर्नेछ।
जुलुस भृकुटीमण्डप प्रवेश गरेपछि औपचारिक उद्घाटन कार्यक्रम सुरू हुनेछ। त्यसपछि बन्दसत्र प्रारम्भ गरिनेछ। विशेष महाधिवेशन सोमबारसम्म सञ्चालन हुनेछ।
हामीले भृकुटीमण्डपमा भेला भएका प्रतिनिधिहरूसँग विशेष महाधिवेशन किन आवश्यक लाग्यो भन्ने विषयमा कुराकानी गरेका छौं।
-1746009348.jpg)
