भेनेजुएलाकी विपक्षी दल नेता मारिया कोरिना मचाडोले आफूले पाएको नोबेल शान्ति पुरस्कार अमेरिकी राष्ट्रपति डोनाल्ड ट्रम्पलाई दिएकी छन्।
बिहीबार ह्वाइट हाउसमा राष्ट्रपति ट्रम्पसँग भएको भेटमा मचाडोले आफूले पाएको नोबेल शान्ति पुरस्कारको पदक हस्तान्तरण गरेकी हुन्।
मचाडोले ट्रम्पलाई आफूले पाएको पुरस्कार हस्तान्तरण गरेको ह्वाइट हाउसका अधिकारीहरूले पुष्टि गरेका छन्।
त्यस्तै राष्ट्रपति ट्रम्प आफैले पनि सामाजिक सञ्जाल प्ल्याटफर्म ट्रुथ सोसलमा पोस्ट लेख्दै मचाडोबाट आफूले नोबेल शान्ति पुरस्कारको पदक प्राप्त गरेको बताएका छन्।
'मेरो कामको सम्मानस्वरूप मारियाले आफ्नो नोबेल शान्ति पुरस्कार मलाई प्रदान गर्नुभएको छ। यो पारस्परिक सम्मानको सुन्दर संकेत हो। धन्यवाद मारिया,' ट्रम्पले ट्रुथ सोसलमा लेखेका छन्।
माचाडोले पनि भेटवार्ता अत्यन्त सकारात्मक भएको बताउँदै भेनेजुएली जनताको स्वतन्त्रताप्रति ट्रम्पले देखाएको प्रतिबद्धताको कदरस्वरूप आफूले पाएको पदक ट्रम्पलाई दिएको बताएकी छन्।
ट्रम्प उक्त पदक आफैले राख्ने तयारीमा रहेको ह्वाइट हाउसका अधिकारीहरुलाई उद्धृत गरेर अन्तर्राष्ट्रिय समाचार संस्था रोयटर्सले लेखेको छ।
नोबेल पुरस्कार प्रदान गर्ने नर्वेजियन नोबेल इन्स्टिच्युटले भने यसअघि नै पुरस्कार हस्तान्तरण, बाँडफाँड वा फिर्ता गर्न नमिल्ने स्पष्ट पारिसकेको छ।
'एक पटक नोबेल पुरस्कार घोषणा भइसकेपछि यसलाई खारेज गर्न, बाँड्न वा अरूलाई हस्तान्तरण गर्न सकिँदैन। यो निर्णय अन्तिम हुन्छ र सधैँका लागि कायम रहन्छ,' नर्वेली नोबेल समिति र नर्वेली नोबेल संस्थानले भनेका छन्।
यसको अर्थ मचादोले पुरस्कारस्वरूप पाएकी सुनको पदक ट्रम्पलाई उपहार दिए पनि नोबेल शान्ति पुरस्कारको सम्मान भने उनकै नाममा कायम रहनेछ।
ट्रम्पले दाबी गरेको नोबेल शान्ति पुरस्कार जितेपछि मचाडोले अमेरिकी राष्ट्रपतिको प्रशंसा गर्दै आएकी थिइन्।
साथै सैनिक हस्तक्षेप गरेर भए पनि भेनेजुएलाका राष्ट्रपति मदुरोलाई सत्ताच्युत गर्न ट्रम्पलाई आग्रह गर्दै आएकी थिइन्। उनको माग अनुसार ट्रम्पले सेना पठाएर मदुरोलाई पक्राउ गरेर अमेरिका लगिसकेका छन्। अहिले त्यहाँ उनीविरूद्ध मुद्दा चलाइएको छ।
मदुरो पक्राउपछि आयोजित पत्रकार सम्मलेनमा ट्रम्पले भेनेजुएलाकी विपक्षी नेता मचाडोले शासन नचलाउने स्पष्ट पारेका थिए।
मचाडो असल भए पनि देशभित्र उनको समर्थन नभएको भन्दै उनलाई शासन चलाउन गाह्रो हुने ट्रम्पले औंल्याएका थिए। आफूले चाहेको नोबेल पुरस्कार मचाडोले पाएको तुष ट्रम्पले पोखेको भनेर कतिले आकलन गरेका थिए।
त्यसको एक साता नबित्दै ट्रम्पले मचाडोको हातबाट नोबेल पुरस्कार थाप्ने बताएका थिए।
ट्रम्पले गत वर्ष नोबेल शान्ति पुरस्कार पाउनु पर्ने दाबी गर्दै आएका थिए। त्यसकै लागि केही महिनाअघि नर्वेका अर्थमन्त्री जेन्स स्टोल्टेनबर्गलाई उनले अकस्मात् फोन गरेर सो पुरस्कारका लागि आफ्नो दाबी प्रस्तुत गरेका थिए।
अमेरिकाले नेतृत्व गरेको सैन्य गठबन्धन नेटो महासचिवको १० वर्षको कार्यकाल स्टोल्टेनबर्गले गत वर्षको अक्टोबरमा पूरा गरेका थिए।
ट्रम्पको पहिलो कार्यकालमा पनि स्टोल्टेनबर्ग नेटो महासचिव रहेका कारण ट्रम्पको उनीसँग राम्रो चिनजान थियो। त्यसैले उनले स्टोल्टेनबर्गसँग पुरस्कारबारे कुरा गरेका थिए।
स्विडेनका वैज्ञानिक अल्फ्रेड नोबेलको नाममा विभिन्न विधामा दिइने नोबेल पुरस्कार स्विडेनमा रहेको नोबेल फाउन्डेसनले दिन्छ।
नोबेल शान्ति पुरस्कार विजेताको छनोट भने नर्वेली नोबेल समितिले गर्छ। सो समितिमा नर्वेली संसदले सिफारिस गरेका पाँच सदस्य हुन्छन्। त्यसैले ट्रम्पले आफ्नो दाबी पेस गर्न नर्वेली मन्त्रीसँग कुरा गरेका थिए।
नोबेल पुरस्कार पाउने ट्रम्पको उत्कट चाहना छ। उनको पहिलो कार्यकालभन्दा पहिलेका राष्ट्रपति बाराक ओबामाले पनि नोबेल शान्ति पुरस्कार पाएका थिए। ओबामाले केही नगरी नोबेल पुरस्कार पाएको भन्दै ट्रम्पले पहिलो कार्यकालदेखि नै सो पुरस्कारको दाबी गर्दै आएका थिए।
दोस्रो कार्यकालमा पनि उनले बारम्बार त्यसको दाबी गर्दै आएका छन्।
उनलाई खुसी पार्न भारत-पाकिस्तानको युद्ध रोकेको भन्दै पाकिस्तानले अनि इरान-इसराइल युद्ध रोकेको भन्दै इसराइलले नोबेल पुरस्कारका लागि उनलाई औपचारिक रूपमा सिफारिस नै गरेका थिए।
आफूले नगरेको कामको पनि श्रेय लिने ट्रम्पले दोस्रो कार्यकालमा आठ वटा युद्ध रोकेको दाबी गर्दै आएका थिए।
-1746009348.jpg)
