नेपाली कांग्रेसले सभापति गगन थापालाई भावी प्रधानमन्त्रीका रूपमा आगामी चुनावमा जाने घोषणा गरेको छ।
नेपाली कांग्रेसका उपसभापति विशवप्रकाश शर्माले फेसबुक लाइभ भिडिओमा यस्तो घोषणा गरेका हुन्।
'हामीले प्रधानमन्त्रीका लागि नेपाली कांग्रेस पार्टीको छलफल हुँदै गर्दा प्रधानमन्त्रीको कोही उम्मेद्वार बनाऊँ भनेका थियौं, ताकि देशलाई प्रस्ट सन्देश दिन सकियोस्। हामीले गगन थापालाई नै तोकेर जाऊँ भनेका थिएनौं,' उपसभापति शर्माले भने, 'तर आज म नेपाली कांग्रेस पार्टीको उपसभापतिका रूपमा देशभरिको पार्टी पंक्तिलाई छलफलमा जोड्दै गर्दा तपाईंहरूको मनमा रहेको नाम भनेको गगनकुमार थापा हो भन्ने मैले थाहा पाएको छु। त्यसैले कांग्रेस एउटा ऊर्जाका साथ, उज्यालो दृष्टिकोणका साथ अगाडि जाँदै गर्दा पार्टीका सभापतिलाई नै प्रधानमन्त्री बनाउने गरी हामी जान्छौं।'
शर्माले अबका दिनमा विशेष महाधिवेशनको पक्षमा हस्ताक्षर गर्ने र नगर्नेहरूबीचको दरार र दुरी नराखी पार्टीलाई अगाडि बढाउने पनि बताए।
निर्वाचन आयोगले विशेष महाधिवेशनबाट निर्वाचित गगत थापा नेतृत्वको कार्यसमिति नै आधिकारिक नेपाली कांग्रेस हो भन्ने निर्णय गरेपछि उपसभापति शर्माले फेसबुकमा लाइभ भिडिओमार्फत यस्तो प्रतिक्रिया दिएका हुन्।
'जो बदलिन्छन्, उनीहरूले बदल्न सक्छन्। हामीले पनि अब बदल्ने संकल्प लिनुपर्छ,' उनले भने, 'विशेष महाधिवेशनमा जसले हस्ताक्षर गरे पनि वा नगरे पनि हामीबीच अब त्यो दरार र दुरी रहनु हुँदैन।'
उनले अगाडि भने, 'एकथरी साथीहरूले सार्थक हस्तक्षेप गरिसकेको छ। अर्काथरी साथीहरूले पनि हस्तक्षेप गर्ने बेला आएको छ।'
अब नेपाली कांग्रेस पार्टीले जेनजी आन्दोलनले माग गरेको सुशासन प्रत्याभूत गर्ने संकल्प पनि उनले व्यक्त गरे। विगतमा भएका कमी-कमजोरीका लागि आत्मालोचित हुँदै त्यसलाई सच्याएर अघि बढ्ने पनि बताए।
-1746009348.jpg)
