वरिष्ठ नेताका रूपमा राष्ट्रिय स्वतन्त्र पार्टी (रास्वपा) प्रवेश गरेका काठमाडौं महानगरपालिकाका मेयर बालेन शाह आज आइतबार नै राजीनामा दिने कि नदिने भनेर छलफलमा छन्।
कानुन अनुसार संघीय सांसदमा उम्मेदवारी दिन स्थानीय तहबाट राजीनामा दिनुपर्ने बाध्यकारी व्यवस्था नभएकाले आजै राजीनामा दिने कि नदिने भनेर उनी दुबिधामा रहेको उनको सचिवालय स्रोतले जानकारी दियो।
'संघीय सांसदमा उम्मेदवारी दिन आजै राजीनामा दिन नपर्ने रहेछ। उम्मेदवार निर्वाचित भए पद रिक्त हुने अवस्था रहेकाले उहाँ छलफलमा जुट्नुभएको हो,' बालेन निकट स्रोतले भन्यो।
यसबीच बालेन आइतबार रास्वपा केन्द्रीय कार्यालय 'घन्टीघर' जाँदैछन्। उनलाई आज दिउँसो २ बजे पार्टी केन्द्रीय कार्यालयमा स्वागत गर्ने कार्यतालिका रहेको प्रवक्ता मनिष झाले बताए।
'पार्टी सभापति रवि लामिछाने र मेयर बालेन शाह आज साँझ ५ बजे बुद्ध एयरको जहाजबाट जनकपुर आउँदै हुनुहुन्छ,' झाले भने।
मेयर बालेन शाह रास्वपाको वरिष्ठ नेता चयन भएका छन्। उनले शपथ भने लिएका छैनन्।
रास्वपाले भोलि जनकपुरमा कार्यक्रम आयोजना गरेको छ। सभापति लामिछाने र मेयर शाह कार्यक्रमका प्रमुख वक्ता हुन्।
-1746009348.jpg)
