राष्ट्रिय स्वतन्त्र पार्टी (रास्वपा)ले झापाका पाँच वटै क्षेत्रमा उम्मेदवारको करिब टुंगो लगाएको छ।
क्षेत्र नम्बर १मा निशा डाँगी उम्मेदवार बन्ने भएकी छन्। यसअघि उनको क्षेत्र नम्बर २मा चर्चा भए पनि डाँगीलाई क्षेत्र नम्बर १ पठाइएको रास्वपाका एक नेताले बताए। डाँगी अघिल्लो पटक समानुपातिकबाट सांसद थिइन्।
अघिल्लो कार्यकालमा उनी कान्छी सांसद पनि थिइन्।
रास्वपा नेताका अनुसार क्षेत्र नम्बर २ मा पूर्व उपसभामुख इन्दिरा राना मगरलाई रास्वपाले उम्मेदवार बनाएको छ। यस क्षेत्रमा नेकपा एमालेबाट निवर्तमान सभामुख देवराज घिमिरेले टिकट पाएका छन्। यहाँ निवर्तमान सभामुख र उपसभामुखबीच प्रतिस्पर्धा हुने भएको हो।
झापा क्षेत्र नम्बर ३ मा पार्टी जिल्ला सभापति प्रकाश पाठक उम्मेदवार बन्ने भएका छन्। उनी अघिल्लो पटक त्यही निर्वाचन क्षेत्रबाट उम्मेदवार थिए।
क्षेत्र नम्बर ४ मा पार्टी सचिव शम्भु सुस्केरा उम्मेदवार बन्ने टुंगो लागेको छ। झापा क्षेत्र नम्बर ५मा भने काठमाडौं महानगरपालिकाका निवर्तमान मेयर बालेन शाहको टुंगो लागेको रास्वपा स्रोतको दाबी छ। झापा नेकपा एमाले अध्यक्ष केपी शर्मा ओलीको गृह जिल्ला पनि हो। त्यस्तै, कांग्रेस उपसभापति विश्वप्रकाश शर्मा, राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देन र कांग्रेसका प्रभावशाली नेता कृष्ण सिटौला पनि झापाकै हुन्।
ओली क्षेत्र नम्बर ५ बाट चुनाव जित्दै आएका छन् भने शर्मा क्षेत्र नम्बर १ बाट निर्वाचित भएका थिए।
क्षेत्र नम्बर ३मा सिटौला र लिङ्देनबीच प्रतिस्पर्धा हुँदै आएको छ। त्यहाँ एमालेका सहयोगमा लिङ्देनले यसअघि निर्वाचित भएका थिए।
चुनावमा सँधै चर्चामा रहने झापामा रास्वपाले यसपटक सुरूमै उम्मेदवार टुंग्याएको छ। काठमाडौं महानगरका पूर्वमेयर शाह उम्मेदवारको रूपमा आउने भएपछि रास्वपाका उम्मेदवारहरू थप उत्साहित छन्।
-1768745050.jpg)
-1746009348.jpg)
