नेपाली कांग्रेसका निवर्तमान प्रचार विभाग प्रमुख मीन विश्वकर्माले आउँदो निर्वाचनका लागि दुबै पक्ष मिलेर जानुपर्ने बताएका छन्।
आइतबार साँझ सामाजिक सञ्जालमा लेख्दै पूर्वसभापति शेरबहादुर देउवा निकट विश्वकर्माले आउँदो निर्वाचनका लागि दुबै पक्ष मिल्नुपर्ने बताएका हुन्। उनले आधा टिकटमा देउवाले हस्ताक्षर गरेको, बाँकी आधामा सभापति गगनकुमार थापाले गरेको हुँदा त्यसलाई स्वीकारेर जानुपर्ने बताएका हुन्।
यसअघि समानुपातिक सूचीको उम्मेदवार देउवाले टुंग्याएका थिए।
‘हिजो भदौ २४ को उपचार फागुन २१ को निर्वाचन हुन सक्छ भने जस्तै हाम्रो झगडाको मिलन पनि यही निर्वाचनले गराउन सक्छ। हिजो उम्मेदवारको टिकटमा कसको हस्ताक्षर हुने भन्ने विवाद थियो। आधामा देउवाले गर्नुभयो। बाँकीमा अब गगनले गर्नुहुन्छ,’ उनले लेखेका छन्।
उनले सबैको सहमतिमा उम्मेदवारीको चयन गर्नुपर्ने बताउँदै देउवा, थापा, निवर्तमान कार्यवाहक सभापति पूर्णबहादुर खड्का र शेखर कोइराला एक ठाउँमा बसेर छलफल गर्नुपर्ने बताएका हुन्।
विशेष महाधिवेशनबाट चयन भएको गगनकुमार थापा नेतृत्वको कार्यसमितिलाई निर्वाचन आयोगले शुक्रबार मान्यता दिएको थियो। त्यससँगै यो विषय आइतबार सर्वोच्च अदालतमा पनि पुगेको छ।
यसरी सर्वोच्च सम्म पुगेको विषयको नतिजा जस्तो आएपनि दुबै पक्ष मिलेर चुनावमा जानुपर्ने उनको भनाइ छ।
-1746009348.jpg)
