चुनाव लड्न लुम्बिनीका दुई प्रदेशसभा सदस्यले दिए राजीनामा

सेतोपाटी संवाददाता

दाङ, माघ ५

धर्मबहादुर चौधरी (बायाँ)/ धनबहादुर मास्की (दायाँ)

प्रतिनिधि सभाको चुनाव लड्न लुम्बिनी प्रदेशका दुई जना प्रदेशसभा सदस्यले पदबाट राजीनामा दिएका छन्।

लुम्बिनी प्रदेशसभा सचिव दुर्लभकुमार पुनका अनुसार दाङको क्षेत्र नं. ३ (२) बाट निर्वाचित प्रदेशसभा सदस्य धनबहादुर मास्की (राजेश) र बर्दियाको निर्वाचन क्षेत्र नं. २ (२) बाट निर्वाचित धर्मबहादुर चौधरीले आइतबार नै राजीनामा प्रदेशसभा सचिवालयमा राजीनामा बुझाएका थिए।

प्रदेशसभा सचिव पुनका अनुसार दुबै जनाको राजीनामा सोमबार सनाखत गरी बेलुकासम्म त्यो स्वीकृत गर्ने कार्य पूरा हुने बताए।

सोमबार बेलुका नै राजीनामा दिएका दुई जना प्रदेशसभा सदस्य नरहेको सार्वजनिक सूचना टाँस गरिने उनले बताए।

फागनु २१ गते हुने निर्वाचन लड्नका लागि राजीनामा बुझाएकाहरूको राजीनामा स्वीकृत भएपछि उनीहरूले माघ ११ गते हुने राष्ट्रिय सभा सदस्य पदको निर्वाचनामा मतदान गर्न पाउने छैनन्।

२०७९ मंसिर ४ गते भएको निर्वाचनमा मास्की तत्कालीन नेकपा (माओवादी केन्द्र) को तर्फबाट निर्वाचित भएका थिए भने चौधरी तत्कालीन नागरिक उन्मुक्ति पार्टीबाट निर्वाचित भएका थिए। मास्की र चौधरी दुबै जना मन्त्री भएका थिए।

मास्की लुम्बिनीका पूर्वआर्थिक मामिला तथा योजना मन्त्री हुन् भने चौधरी पूर्वभौतिक पूर्वाधार मन्त्री हुन्।

प्रदेशसभा सदस्यबाट राजीनामा दिएकामध्ये मास्कीलाई नेपाली कम्युनिस्ट पार्टीले दाङको क्षेत्र नं. ३ मा उम्मेदवार बनाएको छ भने चौधरीलाई उज्यालो नेपाल पार्टीले बर्दिया क्षेत्र नं. २ को उम्मेदवार बनाएको छ।

रेशम चौधरी नेतृत्वको नागरिक उन्मुक्ति त्यागेर पछिल्लो समय चौधरी कुलमान घिसिङ नेतृत्वको उज्यालो नेपाल पार्टीमा पार्टी प्रवेश गरेका थिए।