फागुन २१ गते हुने प्रतिनिधिसभा चुनावमा डोल्पामा एकाघरका दाजुभाइबीच प्रतिस्पर्धा हुने निश्चित भएको छ।
नेपाली कम्युनिस्ट पार्टी (नेकपा) ले धनबहादुर बुढा र कांग्रेसले उनका दाइ कर्णबहादुर बुढालाई उम्मेदवार बनाएपछि एउटा मात्रै निर्वाचन क्षेत्र रहेको डोल्पामा दाजुभाइबीच प्रतिस्पर्धा हुने पक्का भएको हो।
दुवैलाई पार्टीले एकल सिफारिस गरेको थियो।
कर्णबहादुर भर्खरै सम्पन्न कांग्रेसको विशेष महाधिवेशनबाट पार्टीको सहमहामन्त्री चयन भएका छन्।
उनी २०७६ सालमा कांग्रेस प्रवेश गरेका थिए। त्यसअघि उनी राष्ट्रिय प्रजातन्त्र पार्टीका केन्द्रीय सदस्य थिए। उनी २०४८ सालदेखि राप्रपामा लागेका थिए।
उनी राप्रपामा तीन पटक निर्वाचित केन्द्रीय सदस्य र एक पटक सहमहामन्त्री मनोनीत भएका थिए। उनले राप्रपाबाटै तीन पटक प्रतिनिधिसभा चुनाव लडेका थिए। तर तीनै पटक पराजित भए।
कर्णबहादुर २०५१ सालमा कांग्रेसकै बागी उम्मेदवार मोतिप्रसाद पहाडीसँग पराजित भएका थिए।
त्यसपछि २०५६ सालमा एमालेका नरबहादुर बुढाथोकी र २०६४ सालमा तत्कालीन माओवादीका रामबहादुर बोहरासँग पराजित भएका थिए।
धनबहादुर भने तीन पटकसम्म डोल्पाबाट निर्वाचित भएका थिए। उनी २०७४, २०७९ को आम निर्वाचन र २०७० को संविधान सभा निर्वाचनमा विजयी भएका थिए।
उनी दोस्रो संविधान सभा निर्वाचनताका राप्रपा छाडेर एमाले प्रवेश गरेका थिए। पछि एमाले पनि छाडेर एकीकृत समाजवादी हुँदै अहिले नेकपासम्म आइपुगेका हुन्।
-1746009348.jpg)
