राष्ट्रिय स्वतन्त्र पार्टी (रास्वपा)का तेह्रथुमका नेता–कार्यकर्ताले सामूहिक राजीनामा दिएका छन्। उम्मेदवार चित्त नबुझेको भन्दै जिल्ला सभापति सुमन खत्री, म्याङलुङ गाउँपालिका, लालिगुरास गाउँपालिका, छदर, फेदाप, आठराई गाउँपालिका समितिका पदाधिकारी एवम् सदस्यहरूले सामूहिक राजीनामा दिएको बताएका छन्।
सोमबार तेह्रथुमका लागि रास्वपाले ऋतुराज लिम्बूलाई उम्मेदवार बनाएको थियो। त्यहाँको पार्टी समितिले सरेन्द्र कार्की प्रस्ताव गरेको र त्यसमा जिल्लाका जेनजी अगुवा र केही नवोदित पार्टीको समर्थर रहेको तथ्य बिर्सिएर केन्द्रले एकलौटी गरेको उनीहरूले आरोप लगाएका छन्।
‘भदौ २३ र २४ गतेको जेनजी जनआन्दोलनबाट मुलुकले नयाँ राजनीतिक मोड लिएको कुरा सबैमा विदितै छ। यसलाई शिरोपर गर्दै तेह्रथुमबाट युवा, अब्बल र सक्षम उम्मेदवारको रूपमा अवेर तेह्रथुमरका संयोजक सरेन्द्र कार्कीलाई अन्य केही पक्ष र दलको साझा उम्मेदवारको रूपमा घण्टी चुनाव चिह्न लिई अगामी निर्वाचनमा अगाडि बढाउने राजनीतिक सहमति भएको थियो। यसै बमोजिम राष्ट्रिय स्वतन्त्र पार्टीको नियमित प्रक्रिया अनुसार प्रदेश र केन्द्रमा सम्पूर्ण औपचारिकता पूरा गरिएको थियो। यसको बाबजुद पार्टीले नै पारित गरेको उम्मेदवार छनौट प्रक्रिया भन्दा बाहिर गएर जिल्ला कार्य समिति र प्रदेश समितिको भावनाविपरीत अमूक व्यक्तिलाई उम्मेदवारको टिकट दिँदा पार्टीको विधि माथि त प्रश्न उठ्यो नै जिल्लागत रूपम व्यापक राजनीतिक सहमतीबाट गरिएको निर्णयमा समेत कुठराघात भयो,’ सामूहिक राजीनामा पत्रमा भनिएको छ।
यसले तेह्रथुमको जनभावनामा गम्भिर असर पुर्याएको उनीहरूको ठहर छ। केन्द्र र प्रदेशसँग सहकार्य गर्दै गरिएको व्यापक राजनीतिक सहमति पूरा गर्न नसकेको नैतिक जिम्मेवारी लिँदै सम्पूर्ण राष्ट्रिय स्वतन्त्र पार्टी, जिल्ला कार्य समिति तेह्रथुम, सबै पालिका समिति, सबै वडा समिति सामूहिक राजीनामा पेस गरेको विज्ञप्तिमा उल्लेख गरिएको छ।
-1746009348.jpg)
