नेपाली कांग्रेसले बाँकेका तीन वटै निर्वाचन क्षेत्रमा उम्मेदवार टुंगाएको छ।
आगामी फागुन २१ गते प्रतिनिधि सभाको निर्वाचनका क्षेत्र नम्बर १ मा जिल्ला सभापति नारायणप्रसाद गौडेल, क्षेत्र नम्बर २ मा जिल्ला सचिव सुधान्सु कोइराला र क्षेत्र नम्बर ३ मा लुम्बिनी प्रदेश सभापति अमरसिंह पुनलाई उम्मेदवार बनाइएको छ।
जिल्ला सभापति गौडेलले २०७४ सालमा प्रदेश सभा १ (२) मा पराजित भएका थिए। तत्कालीन बाम गठबन्धनका उम्मेदवार आरती पौडेलले गौडेललाई पराजित गरेका थिए।
जिल्ला सचिव सुधाम्सु पूर्वपार्टी सभापति एवम् पूर्वप्रधानमन्त्री स्वर्गीय सुशील कोइरालाका भााइका छोरा हुन्।
सुधाम्सुका बुवा स्वर्गीय डा. अरूण कोइराला र आमा किरण कोइराला कांग्रेस बाँकेका पूर्वसभापति हुन्। सुधान्सु पहिलो पटक चुनाव लड्न लागेका नेता हुन्।
लुम्बिनी प्रदेश सभापति पुन रोल्पा निवासी हुन्। बाँके–३ मा अघिल्लो चुनावमा पार्टीका निवर्तमान सहमहामन्त्री किशोरसिंंह राठौर निर्वाचित भएका थिए।
यो पटक राठोरले बाँके ३ मा चुनाव लड्ने इच्छा नगरेको हुँदा त्यहाँ प्रदेश सभापति पुनलाई पठाइएको हो। राठोरले आफ्नो गृह जिल्ला बर्दिया–२ बाटै चुनाव लड्ने चाहना राखेका छन्।
त्यस्तै, नेकपा (एमाले) ले बाँकेको क्षेत्र नम्बर ३ मा अन्तिम समयमा उम्मेदवार परिवर्तन गरेको थियो।
एमालेले पूर्वराज्य मन्त्री एवं संविधानसभा सदस्य दलबहादुर सुनारलाई उम्मेदवार बनाएको भए पनि अन्तिमा युवा सुमन मल्ललाई टिकट दिएको थियो।
मल्ल गत स्थानीय चुनामा खुजुरा गाउँपालिकाको अध्यक्षमा पराजित भएका थिए।
बाँके क्षेत्र नं. ३ मा नेपाली कम्युनिष्ट पार्टी (नेकपा) बाट दीपक जिएम, राष्ट्रिय स्वतन्त्र पार्टी (रास्वपा) बाट खगेन्द्र सुनार उम्मेदवार छन्।
एमालेले क्षेत्र नम्बर १ मा विघठित प्रतिनिधि सभा सदस्य सूर्य ढकाललाई पुनः उम्मेदवार बनाएको छ।
क्षेत्र नम्बर २ मा पूर्वमन्त्री मोहम्मद इश्तियाक राईलाई टिकट दिएको छ।
उनी अशोक राई नेतृत्वको जनता समाजवादी पार्टीको केन्द्रीय महासचिव हुन्।
रास्वपाले क्षेत्र नं. १ मा सुरेश थारु र क्षेत्र नं. २ मा विवेक श्रेष्ठलाई उम्मेदवार बनाएको छ।
-1746009348.jpg)
