फागुन २१ गते हुन लागेको प्रतिनिधि सभाको निर्वाचनका लागि उम्मेदवारी दर्ता गराउनेमा सबभन्दा कम दुई जिल्लामा देखिएको छ।
मंगलबार साँझसम्म मनाङ र मुस्ताङ दुई जिल्लामा सबभन्दा कम उम्मेदवारी दर्ता भएको हो।
मनाङमा ५ र मुस्ताङमा ८ जनाले मात्र उम्मेदवारी दर्ता गराएका छन्।
मनाङका मुख्य निर्वाचन अधिकृत रामप्रसाद पौडेलका अनुसार नेपाली कांग्रेसबाट ७१ वर्षीय टेकबहादुर गुरूङ, नेपाली कम्युनिस्ट पार्टी (नेकपा) को तर्फबाट ५७ वर्षीया यशोदा गुरूङ सुवेदी, नेकपा एमालेबाट ६६ वर्षीय पोल्देन छोपाङ गुरूङले उम्मेदवारी दर्ता गराएका छन्।
राष्ट्रिय प्रजातन्त्र पार्टी (राप्रपा) बाट ६२ वर्षीय कुविरसिंह गुरूङ र मंगोल नेशनल अर्गनाइजेसनबाट रामबहादुर घलेले उम्मेदवारी दर्ता गराएको अधिकृत पौडेलले जानकारी दिए।
'उम्मेदवारी दर्ता गराउन आएर विविध कारणले फर्किएको कुनै रेकर्ड छैन,' उनले भने, 'आएकाहरू सबैको उम्मेदवारी दर्ता भएको छ।'
उनका अनुसार राष्ट्रिय स्वतन्त्र पार्टीबाट कोही एक जना व्यक्ति फारामबारे सोधपुछ लागि आएका थिए। उनी सोधपुछ गरेर फर्किएपछि उक्त पार्टीबाट कुनै पनि व्यक्ति आएनन्।
मनाङपछि थोरै उम्मेदवारी दर्ता गराउने दोस्रो स्थानमा मुस्ताङ छ।
मुस्ताङका मुख्य निर्वाचन अधिकृत विद्याराज पौडेलका अनुसार ८ जनाले मात्र उम्मेदवारी दर्ता गराएका छन्।
जसमा आम जनता पार्टीबाट २६ वर्षीय अजय विक, राष्ट्रिय स्वतन्त्र पार्टी (रास्वपा) ३९ वर्षीय अधितीय चन्द थकाली, नेपाल कम्युनिस्ट पार्टी (एकीकृत माक्सवादी लेनिनवादी) ५६ वर्षीय इन्द्रधारा डादु विष्ट, राष्ट्रिय प्रजातन्त्र पार्टीबाट ६० वर्षीया कमला लालचनले उम्मेदवारी दर्ता गराएका छन्।
त्यस्तै, नेपाल कम्युनिष्ट पार्टीबाट ६१ वर्षीय मुटुक गुरूङ, मंगोल नेसनल अर्गनाइजेसनबाट ४४ वर्षीय यमबहादुर गुरूङ, नेपाली कांग्रेसबाट ३२ वर्षीय योगेश गौचन थकाली र उज्यालो नेपाल पार्टीबाट ६८ वर्षीय सुरेन्द्र शेरचनले उम्मेदवारी दर्ता गराएको अधिकृत पौडेलले जानकारी दिए।
'अबेरसम्म पर्खिँदा पनि थप उम्मेदवार आएनन्,' उनले भने, 'कानुनी प्रक्रिया पुर्याएर आउनेको उम्मेदवारी दर्ता भएको छ।'
-1746009348.jpg)
