चुनावी प्रतिस्पर्धामा फरक राजनीतिक दलका उम्मेदवारहरूबीच पनि आपसी सद्भाव र मित्रता कायम हुन सक्छ भन्ने गतिलो सन्देश गुल्मीमा देखिएको छ।
फागुन २१ गते हुन गइरहेको प्रतिनिधिसभा सदस्य निर्वाचनका लागि गुल्मी क्षेत्र नम्बर २ का उम्मेदवारहरूबीच खुसी साटासाट भएको दृश्यले चुनावी माहौललाई सकारात्मक बनाएको छ।
नेकपा एमालेका तर्फबाट उम्मेदवार बनेका गोकर्ण विष्ट र नेपाली कांग्रेसका तर्फबाट उम्मेदवार भुवनप्रसाद श्रेष्ठले एक आपसमा शुभकामना आदान–प्रदान गर्दै मित्रता कायम रहेको सन्देश दिएका हुन्।
फरक फरक राजनीतिक दलबाट एउटै क्षेत्रमा प्रतिस्पर्धा भए पनि व्यक्तिगत सम्बन्ध र सामाजिक सद्भाव अझै मजबुत रहेको उम्मेदवारहरूको व्यवहारबाट देखिएको छ।
आआफ्ना पार्टीका नेता तथा कार्यकर्ता सहित निर्वाचन कार्यालय पुगेका विष्ट र श्रेष्ठले उम्मेदवारी दर्ता गर्नुअघि एक आपसमा अंकमाल गर्दै शुभकामना साटासाट गरेका थिए।
उनीहरूले लोकतान्त्रिक अभ्यासमा स्वस्थ प्रतिस्पर्धा आवश्यक रहेको र चुनावलाई द्वेष वा टकरावभन्दा पनि विचारको प्रतिस्पर्धाका रूपमा लिनुपर्ने धारणा व्यक्त गरेका छन्।
चुनावी समयमा उम्मेदवारहरूबीच देखिएको यस किसिमको सौहार्दताले शान्त, सभ्य र जिम्मेवार चुनावी वातावरण निर्माणमा सहयोग पुग्ने अपेक्षा गरिएको छ।
त्यस्तै, गुल्मी क्षेत्र नं. १ मा पनि नेपाली कांग्रेसका चन्द्र भण्डारी, एमालेका प्रदीप ज्ञवाली र नेपाली कम्युनिस्ट पार्टीका सुदर्शन बरालले उम्मेदवारी दर्ता गर्नुअघि सँगै फोटो खिचाएर शुभकामना साटासाट गरेका थिए।
-1746009348.jpg)
