निवर्तमान शिक्षामन्त्री महावीर पुनलाई पछिल्लो समय धेरैले सोधेका थिए, 'तपाईं पनि चुनाव लड्ने होइन?'
यस्ता प्रश्नमा उनी प्राय: आफूलाई राजनीतिमा रूचि नभएको जबाफ दिन्थे।
यसबीच आइतबार खेलकुदमन्त्री बब्लु गुप्ता र सोमबार सञ्चारमन्त्री जगदिश खरेलले राजीनामा दिएर राष्ट्रिय स्वतन्त्र पार्टी (रास्वपा) बाट फागुन २१ को चुनाव लड्ने घोषणा गरे।
यसरी नागरिक सरकारका मन्त्रीहरूले राजीनामा दिएर उम्मेदवार बन्न जानु शोभनीय नभएको आलोचना पनि खुब भयो। तर आलोचना गर्नेहरूले महावीर पुन लगायत सरकारमै बसेका मन्त्रीहरूलाई धन्यवाद पनि दिए।
उनै महावीर पुनले उम्मेदवारी दर्ता गर्ने दिन माघ ६ गते बिहान एक्कासि आफ्नो पदबाट राजीनामा दिएको खबबर आयो। सुरूमा उनले किन राजीनामा दिए भन्ने खुलेन।
पछि त उनी चुनावमा स्वतन्त्र उम्मेदवारी दिन बिहानै म्याग्दी पुगेको थाहा भयो।
मनोनयन पत्र दर्ता गरेपछि पत्रकारहरूसँग कुरा गर्दै पुनले 'जनताको दिमागको घन्टी बजाउन उम्मेदवारी दिएको' बताए।
'दिमागको घन्टी बजाउने क्या, बजाउने घन्टी होइन,' म्याग्दीमा उम्मेदवारी दर्तापछि संवाददाताहरूसँग कुरा गर्दै पुनले भने, 'हामीकहाँ युवाहरूको पनि ढंग छैन। खुट्टा तानातान मात्र छ।'
'हिजो अस्तिसम्म युवाहरूले केही गर्छ कि भनेको थिएँ, उनीहरूले पनि केही गर्दैनन्,' उनले अगाडि भने, 'सबै युवाहरू आफू प्रधानमन्त्री हुन्छु भन्छन् तर एकआपसमा मिल्दैनन्।'
यसै सन्दर्भमा हामीले बुधबार बिहान महावीर पुनसँग कुरा गरेका छौं।
हामीले उनलाई सोध्यौं, 'तपाईं त राजीनामा दिन्नँ, चुनाव उठ्दिनँ भन्दै आउनुभएको थियो। अचानक दुवै कुरा गर्नुभो। तपाईंले राजीनामा दिएर चुनाव उठ्ने निर्णय कहिले गर्नुभयो?'
जबाफमा उनले भने, 'माघ ४ गते राति सांसदको चुनाव लड्ने सोच बनाएँ, त्यही बेला निर्णय गरेँ।'
हामीले उनलाई चुनाव लड्ने निर्णय गर्नुका कारण सोध्दा उनले भने, 'मैले तीन-चार वटा अध्यादेश र नियमावली ल्याउन खोजेको थिएँ। त्यो पूरा भइदिएको भए म यो चुनाव लड्ने थिइनँ।'
ती अध्यादेश र नियमावलीबाट नेपालको शिक्षा क्षेत्र र विज्ञान मन्त्रालय बलियो बनाउने उद्देश्य लिएको पुन बताउँछन्।
'शिक्षा क्षेत्र सुधार्न र विज्ञान मन्त्रालयलाई राम्रो बनाउन खोजेको थिएँ, सकिनँ,' पुनले सेतोपाटीसँग भने, 'मैले ल्याउन खोजेका कतिपय अध्यादेश मन्त्रिपरिषदमा पेस भएर थप अध्ययनका लागि विधान समितिमा थिए। नियमावली पनि बनाएर अन्तिम चरणमा पुगिसकेको थियो।'
पुनले बुधबार बिहान आफ्नो फेसबुकमा 'अध्यादेश र नियमावली ल्याउन मुख्य सचिवले रोकेको' बताएका छन्।
'देशलाई समृद्ध बनाउन नगरी नहुने र मैले ल्याउन खोजेका तीन वटा अध्यादेश र चार वटा नियमावली राष्ट्रपति र विधान समितिले स्वीकार गरेको भए म यो चुनाव लड्ने थिइनँ। एउटा छुट्टै बलियो विज्ञान, प्रविधि र नवप्रवर्तन मन्त्रालय बनाउन मुख्य सचिवले अल्झाए। अनि त रिस उठ्यो र म्याग्दीतिर दगुरेँ,' उनले भनेका छन्।
पुनले ल्याउन खोजेका ती अध्यादेश र नियमावली चुनावी आचारसंहिताका कारण रोकिएको भन्ने सरकारी अधिकारीहरूको भनाइ छ। चुनावको मुखमा दीर्घकालीन महत्त्वका कानुन, नियमावली ल्याउन नमिल्ने हुँदा थाती रहेको एक अधिकारीले बताए।
हामीले यही कुरा पुनलाई सोध्दा उनले भने, 'मैले यो अहिलेदेखि भनेको होइन नि। आचारसंहिता लागू हुनुअघि देखिकै कुरा हो। मैले मन्त्री भएदेखि नै यसमा तयारी गर्दै आएको थिएँ। विभिन्न चरण पार गरेर, मन्त्रिपरिषद पनि पार गरेर अगाडि बढिसकेको थियो, तर अन्तिममा रोकियो।
'मैले अन्तिम घडीसम्म पनि ट्राई गरेँ, तर मिलेन। अनि राजीनामा दिएर चुनाव लड्न हिँडेँ,' उनले भने।
मन्त्री भएर मात्र आफूले चाहेको कानुन बनाउन नसकेपछि त्यसका लागि सांसद बन्नुपर्ने रहेछ भन्ने लागेको र चुनाव लड्न हिँडेको उनको भनाइ छ।
यति मात्र होइन, शिक्षामन्त्रीका रूपमा मागे अनुसारको बजेट अर्थ मन्त्रालयबाट निकासा नहुनु पनि उनले राजीनामा दिनुको कारण हो भन्ने चर्चा पनि छ।
हामीले यो कुरा पनि महावीर पुनलाई सोध्यौं।
यसको जबाफमा उनले व्यक्तिगत फाइदाका लागि बजेट नमागेको र उक्त बजेटबाट नवप्रवर्तन कोष खडा गर्न खोजेको बताए।
'विज्ञान र प्रविधि अनुसन्धानका लागि एउटा नवप्रवर्द्धन कोष खडा गर्न खोजेको थिएँ। त्यो पनि अध्यादेशकै रूपमा लगेको थिएँ,' उनले भने, 'तर भित्रभित्रै के के भन्छन्! फटाहा कुरा गर्ने रैछन्!'
पुनलाई हामीले उनको राष्ट्रिय आविष्कार केन्द्र के हुन्छ भनेर पनि सोधेका थियौं।
उनले आफू मन्त्री बन्नुअघि नै उक्त संस्था छाडिसकेको भन्दै प्रविधिको क्षेत्रमा नयाँ युवाहरू तयार गर्नुपर्ने बताए।
म्याग्दीमा कांग्रेसबाट कर्णबहादुर (केबी) भण्डारी, एमालेबाट हरिकृष्ण श्रेष्ठ, नेपाली कम्युनिस्ट पार्टीबाट अर्जुनबहादुर थापा, राष्ट्रिय स्वतन्त्र पार्टीबाट युवराज रोका उम्मेदवार छन्।
-1758537165.jpg)
-1746009348.jpg)
