कुलेखानी–काठमाडौँ सडकखण्डअन्तर्गत मकवानपुरको इन्द्रसरोवर गाउँपालिका– २ सिमखोला पुल नजिक भएको सवारी दुर्घटनामा एक जनाको मृत्यु भएको छ।
जिल्ला प्रहरी कार्यालय मकवानपुरका प्रवक्ता पुष्कर बोगटीका अनुसार सर्लाहीबाट काठमाडौं आउँदै गरेको मधेस प्रदेश ०३–००१ च ६७२१ नम्बरको गाडी गएराति १ बजे दुर्घटना भएको थियो।
कुखुरा लोड भएको उक्त गाडीको ब्रेक फेल भएर अनियन्त्रित भई सडकबाट ५/७ मिटर तलको खोल्सामा खसेको थियो।
गाडीमा चालकसहित ३ जना सवार रहेकोमा तीनै जना घाइते भएका थिए।
चालक सर्लाही बहरथवा नगरपालिका-१ का २५ वर्षीय रामवलि साह, दुई सहयोगीहरू १७ वर्षीय रोहन मण्डल र १६ वर्षीय छोटे पासवान घाइते भएका थिए।
उनीहरूलाई उपचारका लागि एम्बुलेन्समा काठमाडौं पठाइएको थियो।
डिएसपी बोगटीका अनुसार गम्भीर घाइते भएका रोहन मण्डलको उपचारकै क्रममा पौने ५ बजे मृत्यु भएको हो।
बाँकी दुई जनाको काठमाडौं मेडिकल कलेजमा उपचार भइरहेको छ।
गाडीमा ५०० कुखुरा रहेको ३०० वटा मरेको पनि प्रहरीले जनाएको छ।
-1746009348.jpg)
