अमेरिकी राष्ट्रपति डोनाल्ड ट्रम्पले ग्रिनल्याण्ड सम्बन्धी सम्झौताको खाका बनिसकेको दाबी गरेका छन्।
राष्ट्रपति ट्रम्पले आफ्नो ट्रुथ सोसल अकाउन्टमा पोस्ट लेखेर ग्रिनल्याण्डसँग सम्झौताको खाका तयार भएको बताएका हुन्।
'ग्रिनल्यान्ड र समग्र आर्कटिक क्षेत्रलाई समेटेर भविष्यको सम्झौताको ढाँचा बनेको छ। यो सम्झौता कार्यान्वयन भयो भने अमेरिका र सबै नेटो देशका लागि उत्कृष्ट हुनेछ,' उनले भनेका छन्।
ट्रम्पले सम्झौताको खाका तयार भएको बताएर युरोपेली राष्ट्रहरूमाथि यसअघि लगाउने भनिएको थप भन्सार पनि नलगाउने घोषणा गरेका छन्।
ट्रम्पले ग्रिनल्याण्डमा प्रस्तावित हवाई प्रतिरक्षा प्रणाली 'गोल्डेन डोम'बारे थप छलफल हुने बताएको पनि अमेरिकी अखबार वासिङ्टन पोस्टले लेखेको छ।
स्वीटजरल्याण्डको डाभोसमा बुधबार नेटो महासचिव मार्क रूटेसँग ट्रम्पले एक्ला एक्लै भेटवार्ता गरेका थिए।
विश्व आर्थिक मञ्च (वर्ल्ड इकोनोमिक फोरम)मा सम्बोधन गर्दा ट्रम्प युरोपप्रति रुष्ट देखिएकोमा नेटो महासचिवसँगको भेटपछि केही नरम भएको पनि वासिङ्टन पोस्टले लेखेको छ।
पछि पत्रकारहरूसँगको कुराकानीमा पनि ट्रम्पले सम्झौताको खाका तयार भएको र त्यसमा प्रगति पनि भइरहेको बताएका थिए।
'यो सम्झौता धेरै अगाडि बढिसकेको छ। यसले अमेरिकालाई चाहिएको सबै कुरा दिलाउँछ। यो सम्झौता सदाका लागि पनि हो,' उनले भने।
ग्रिनल्याण्ड अमेरिकी अधिनमा हुन्छ कि हुँदैन भन्ने प्रश्नमा भने ट्रम्पले प्रष्ट जबाफ दिएनन्।
ट्रम्पले यसअघि युरोपका ८ देशहरूलाई बढाइएका भन्सार दर पनि फिर्ता लिएको घोषणा गरेका छन्।
उनले फेब्रुअरी १ देखि १ प्रतिशत बढाउने गरी डेनमार्क, नर्वे, स्विडेन, फ्रान्स, जर्मनी, नेदरल्याण्ड, फिनल्याण्ड र बेलायतबाट अमेरिका आयात हुने सामानमा थप १० प्रतिशत भन्सार बढाउने चेतावनी दिएका थिए।
डाभोसमा सम्बोधनपछि उनले भन्सार शुल्क घटाउने घोषणा गरेको वासिङ्टन पोस्टले लेखेको छ।
ट्रम्पले युरोपले सधैँ अमेरिकाबाट लाभ लिएको तर दिने बेला पछि हटेको भनेर भन्सार दर बढाउने घोषणा गरेका थिए।
डाभोसमै सम्बोधनका क्रममा ट्रम्पले ग्रिनल्याण्ड हासिल गर्न बल प्रयोग नगर्ने घोषणा गरेका छन्।
डेनमार्कका विदेशमन्त्री लार्स लोक्के रासमुसेनले अमेरिकाले ग्रिनल्याण्डको स्वामित्व नलिने दाबी गरेका छ्न।
ट्रम्पले भन्सार फिर्ता लिएपछि युरोपमा तनाव घटाएको बताएका छन्।
नेटोकी प्रवक्ता एलिसन हार्टका अनुसार आगामी छलफलहरू आर्कटिक सुरक्षामा केन्द्रित हुनेछन्।
'डेनमार्क, ग्रिनल्यान्ड र संयुक्त राज्यबीच रुस र चीनलाई ग्रिनल्यान्डमा आर्थिक वा सैन्य रूपमा प्रभाव जमाउन नदिने उद्देश्यले वार्ता हुनेछ,' उनले भनिन्।
यो पनिः ग्रिनल्याण्ड अमेरिकी स्वामित्वमा ल्याउन बल प्रयोग नगर्ने ट्रम्पको घोषणा
-1746009348.jpg)
