राष्ट्रिय स्वतन्त्र पार्टी (रास्वपा)ले गोरखा–२ मा डा. बाबुराम भट्टराईको साथ खोजेको छ।
गोरखा–२ मा प्रगतिशील लोकतान्त्रिक पार्टीबाट भट्टराई उम्मेदवार छन्।
२०६४ देखि २०७४ सम्म सांसद निर्वाचित भएका भट्टराईले यसपटक चौथोपटक उम्मेदवार छन्। अघिल्लो पटक डा. भट्टराईले माओवादी केन्द्रका अध्यक्ष पुष्पकमल दाहाल ‘प्रचण्ड’लाई त्यस क्षेत्र छाडेका थिए।
त्यहाँबाट लगातार चुनाव जित्दै आएका भट्टराईलाई यसपटक महामन्त्री कविन्द्र बुर्लाकोटीलाई सघाउन सभापति रवि लामिछानेले आग्रह गरेका छन्।
महामन्त्री बुर्लाकोटीका अनुसार सभापति लामिछानेले फोन गरेर भट्टराईलाई आग्रह गरेको बताए।
‘भट्टराई परिवर्तनको आवाज हो। उहाँ सधैं परिवर्तनकै पक्षमा दृढतापूर्वक उभिँदै आउनुभएको छ। मुलुक परिवर्तनको संघारमा भएका बेला भट्टराईलाई यसपटक हामीलाई सघाउँदै उम्मेदवारी फिर्ता लिन सभापतिज्यूले व्यक्तिगत र संस्थागतरूपम पनि आग्रह गर्नुभएको छ,’ महामन्त्री बुर्लाकोटीले भने।
बुर्लाकोटी त्यस क्षेत्रबाट दोस्रोपटक उम्मेदवार छन्। अघिल्लोपटक बुर्लाकोटी तत्कालीन माओवादी केन्द्रका अध्यक्ष पुष्पकमल दाहाल ‘प्रचण्ड’ सँग पराजित भएका थिए।
रास्वपा उपसभापति स्वर्णिम वाग्लेले पनि सामाजिक सञ्जालमार्फत् भट्टराईलाई उम्मेदवारी फिर्ता लिन आग्रह गरेका छन्।
‘पुराना दलहरूले राजनीतिक–सामाजिक सशक्तीकरणका लागि व्यवस्था परिवर्तनकै संघर्षबाट जे जति उपलब्धि हासिल गरे तिनको सारभूत संरक्षण गर्दै आगामी २१औं शताब्दीमा आर्थिक समुन्नतिको बाटो भने नयाँ र वैकल्पिक राजनीतिक दल र अभियानहरूबाट मात्र सफल हुन्छ भन्ने निष्कर्ष सहित नयाँ शक्तिको कल्पना डा. बाबुराम भट्टराईले गर्नुभएको हो। तत्पश्चात् उन्नत बन्दै आएको वैकल्पिक राजनीतिक जगमा आज राष्ट्रिय स्वतन्त्र पार्टीको उदय, विस्तार र उचाइ सम्भव हुन सकेको सर्वविदितै छ। पूर्व प्रधानमन्त्रीका रूपमा उहाँले राष्ट्रिय स्वतन्त्र पार्टीलाई मार्गनिर्देश गर्न वरिष्ठ अभिभावकीय भूमिका निभाउन सक्नुहुनेछ भन्ने हाम्रो विश्वास छ,’ उनले भनेका छन्।
फागुन २१ पछि रास्वपाकै नेतृत्व वा सहभागितामा बन्न सक्ने संघीय सरकारको राजनीतिक–प्रशासनिक एवं सुशासन र विकाससँग सम्बन्धित संक्रमणकालीन व्यवस्थापनमा उनको अनुभवबाट सिक्दै रास्वपाले धेरै गर्नुपर्ने वाग्लेले बताएका छन्।
उनले अगाडि लेखेका छन्, ‘त्यसैले फागुन २१ को आसन्न निर्वाचनमा गोरखा क्षेत्र नम्बर २ बाट उम्मेदवार रहेका डा. भट्टराईलाई उम्मेदवारी फिर्ता लिई आगामी दिनमा राजकाजका विषयमा राष्ट्रिय स्वतन्त्र पार्टीलाई उदारतापूर्वक सघाइ अनुकरणीय देशभक्तिपूर्ण उदाहरण प्रस्तुत गर्नहुन विनम्र अनुरोध गर्दछौं।’
-1746009348.jpg)
