भक्तपुरको बाल सुधार गृहमा तनाव उत्पन्न भएपछि १८ वर्ष नाघेकाहरूलाई नुवाकोट सार्ने तयारी सुरू भएको छ।
गएराति उक्त गृहमा १८ वर्ष नाघेका बालबिज्याइँकर्ताले १८ वर्ष भन्दा कम उमेर समूहका व्यक्तिहरूमाथि कुटपिट गरेका थिए। दुई पक्षबीच झडप हुँदा आगजनी समेतको घटना भएको हो।
शुक्रबार बिहान स्थिति साम्य भएपछि गृह मन्त्रालयमा मन्त्री ओमप्रकाश अर्याल र महिला, बालबालिका तथा जेष्ठ नागरिक मन्त्री श्रद्धा श्रेष्ठको संयोजकत्वमा छलफल भएको थियो।
दुई मन्त्रीसहित अन्य सुरक्षा एवं सरकारी कर्मचारीहरूबीच भएको छलफलपछि १८ वर्ष नाघेका बालबिज्याइँकर्तालाई नुवाकोट स्थानान्तरण गर्न मन्त्री अर्यालले निर्देशन दिएका हुन्।
‘नुवाकोटको कारागारमा केही पूर्वाधारहरू बनाउनुपर्ने छन्। एक हप्ताभित्र सबै कामहरू सकेर बालबिज्याइँकर्तालाई त्यहाँ लग्छौं,’ गृह प्रवक्ता एवं सहसचिव आनन्द काफ्लेले भने।
यसअघि पनि भक्तपुरसहित विभिन्न बाल सुधार गृहमा १८ वर्ष नाघेका उमेर समूहकाले कम उमेर समूहका बालकहरूमाथि कुटपिट गर्ने घटनाहरू बाहिरिँदै आएका छन्।
ठूला उमेर समूहका हुने र सुरक्षाको दृष्टिले पनि प्रहरी भित्र नखटिने भएकाले बेलाबेलामा झडप हुने गरेका छन्।
पछिल्ला समय बनेका छानबिन समितिले १८ वर्ष उमेर नाघेका बालबिज्याइँकर्ताहरूलाई स्थानान्तरण गर्नुपर्ने सुझाव दिइँदै आएको छ।
तर प्रतिवेदनको कार्यान्वयन नहुँदा यस्ता झडपहरू पटकपटक हुने गरेका छन्।
केही समयअघि मात्रै सरकारले सुधार गृहमा रहेका १८ वर्ष माथिका र कम उमेरका बालबिज्याइँकर्तालाई छुट्टै राख्ने निर्णय गरेको थियो।
देशभरिका बाल सुधार गृहमा ११६० जना बालबिज्याइकर्ता छन्। जसमध्ये ७७५ जना १८ वर्ष माथिका छन्। ५८५ जना १८ वर्ष भन्दा मुनिका छन्।
-1746009348.jpg)
