नेकपा एमालेका अध्यक्ष केपी शर्मा ओलीले भावी प्रधानमन्त्रीका उम्मेदवारहरूबीच सार्वजनिक बहसका लागि आफू तयार भएको बताएका छन्।
प्रधानमन्त्रीका उम्मेदवारहरूले सार्वजनिक बहस गर्नुपर्छ भन्ने आवाज उठिरहेको बेला शनिबार च्यासलमा पत्रकारहरूसँगको कुराकानीमा अध्यक्ष ओलीले प्रत्यक्ष प्रसारण हुने गरी खुला बहसका लागि आफू तयार भएको बताएका हुन्।
उनलाई एक जना पत्रकारले सार्वजनिक संवादका लागि तपाईं तयार हो? भनेर प्रश्न गरेका थिए।
जबाफमा ओलीले त्यस्तो कार्यक्रम आवश्यक रहेको बताए।
'प्रधानमन्त्रीको उम्मेदवार हुँ भन्नेहरूको बीचमा संवाद कार्यक्रम राख्नुस् र एउटा पब्लिक डिबेट, ओपन लाइभ गर्न आवश्यक छ,' उनले भने, 'किन प्रधानमन्त्री हुनुपर्ने, के गर्नलाई प्रधानमन्त्री हुनुपर्ने आदि कुराहरू त छलफल गर्नु पर्यो नि।'
'त्यसो भए हजुर तयार हो?,' पत्रकारले फेरि प्रश्न गरे।
'बिल्कुल,' जबाफमा ओलीले भने।
नेकपा एमालेको सचिवालय बैठकले अध्यक्ष ओलीलाई भावी प्रधानमन्त्रीको उम्मेदवार घोषणा गरी चुनावमा जाने निर्णय गरेको थियो।
त्यस्तै, राष्ट्रिय स्वतन्त्र पार्टी (रास्वपा) ले काठमाडौं महानगरपालिकाका पूर्वमेयर बालेन शाहलाई प्रधानमन्त्रीको उम्मेदवार बनाउने गरी एकता गरेको थियो।
नेपाली कांग्रेसको शुक्रबार मात्रै बसेको केन्द्रीय कार्यसमिति बैठकले सभापति गगन थापालाई प्रधानमन्त्रीको उम्मेदवार बनाउने निर्णय गरेको थियो।
यी तीन पार्टीले प्रधानमन्त्रीको उम्मेदवार नै घोषणा गरेपछि अहिले उनीहरूलाई एउटै मञ्चमा राखेर सार्वजनिक बहस गराउनुपर्ने आवाज उठिरहेको छ।
त्यसमा ओलीले गगन थापा र बालेन शाहसँग बहसका लागि आफू तयार भएको बताएका हुन्।
-1769256221.png)
-1746009348.jpg)
