राष्ट्रिय सभा निर्वाचन अन्तर्गत आइतबार सातवटै प्रदेशमा मतदान सुरू भएको छ।
लुम्बिनीमा कर्मचारी मिलन केन्द्र घोराहीमा मतदान भइरहेको छ।
बिहान साढे १० बजेसम्म १२८ मत खसेको निर्वाचन आयोगले जनाएको छ।
आयोगका अनुसार प्रदेश सभा सदस्य तर्फ ४९ जना र स्थानीय तहतर्फ जम्मा ७९जनाले मतदान गरेका छन्।
मतदान दिउँसो ३ बजेसम्म हुनेछ।
लुम्बिनीमा महिला क्लस्टरमा एक जना, अपांगता तथा अल्पसंख्यकतर्फ एक र अन्यतर्फ एक जना रिक्त पदका लागि मतदान भएको हो।
लुम्बिनी प्रदेशमा कांग्रेस–एमाले गठबन्धनबाट लुम्बिनी प्रदेशको तीन सिटमा पूर्वमन्त्री एवं एमाले केन्द्रीय सदस्य गुल्मीकी रामकुमारी झाक्री, कांग्रेसका निर्वतमान केन्द्रीय सदस्य गुल्मीकै चन्द्रबहादुर केसी र दाङ लमहीका कांग्रेस नेता वासुदेव घिमिरे उम्मेदवार छन् ।
कुन दलको मतभार कति?
लुम्बिनी प्रदेशमा प्रदेशसभा र स्थानीय तह गरी कुल ८५२२ मतभार छ। विगतमा प्रदेशसभा सदस्यको मतभार ४८ थियो । अहिले वृद्धि गरेर ५३ पुर्याइएको छ । स्थानीय तहका प्रमुख/उपप्रमुखको मतभार १८ बाट बढेर १९ पुर्याइएको छ ।
लुम्बिनी प्रदेशसभामा ८७ सदस्य थिए । यसबीच ४ जनाले राजीनामा दिएर प्रतिनिधिसभा सदस्यमा उम्मेदवार बनेका छन् । प्रदेशसभाको संख्या ८३ कायम भएको छ । उनीहरूको कुल मतभार ४३९९ हुन्छ ।
त्यस्तै १०९ पालिकाका प्रमुख/उपप्रमुख मा एक जना पद रिक्त रहेको हुँदा कुल मतदाता २१७ मात्रै हुनेछन् । उनीहरूको कुल मतभार ४१२३ हुन्छ । दुवैलाई जोड्दा योगफल ८५२२ पुग्छ ।
योगफलका हिसाबले राष्ट्रिय सभा निर्वाचनमा लुम्बिनी प्रदेशमा सबैभन्दा धेरै मतभार नेपाली कांग्रेसको ३ हजार १७९ छ । त्यसपछि एमालेको २ हजार ८१० छ।
साविक माओवादी केन्द्र र एकीकृत समाजवादीसहितका दल मिलेर नेपाली कम्युनिस्ट पार्टी गठन भइसकेको अवस्थामा प्रदेशसभामा एकीकृत समाजवादीका एक सांसदको मतभार पनि १२३७ मा थप हुने देखिन्छ ।
साना दलमध्ये राप्रपाको २६९ मतभार छ भने नागरिक उन्मुक्ति पार्टीको १५९, जसपाको २७३, लोसपाको १८७, जनमतको १५९, राजमोको १२९, जनता प्रगतिशील पार्टीको ३८ र स्वतन्त्रको ५३ मतभार छ।
तस्बिरहरूः
-1746009348.jpg)
