राष्ट्रिय सभा सदस्यको रिक्त पदमा आइतबार देशभर निर्वाचन भइरहेको छ।
देशभर १९ पदका लागि भइरहेको निर्वाचनमा नेपाली कांग्रेस र नेकपा एमालेले चुनावी गठबन्धन गरेका छन् । निर्वाचनमा प्रदेश सांसद र स्थानीय तहका प्रमुख र उपप्रमुखले मतदान गरिरहेका छन् ।
बिहान ९ बजेदेखि शुरु भएको मतदान दिउँसो ३ बजे सकिनेछ।
गण्डकी प्रदेशबाट नेकपाका नेता नारायणकाजी श्रेष्ठ र एमाले नेतृ भगवती न्यौपानेको रिक्त स्थानमा मतदान भइरहेको छ। उनीहरुको स्थानमा नेपाली कांग्रेसले प्राध्यापक डा. जगत तिमिल्सिना र एमालेले संझना देवकोटा उम्मेदवार उठाएका छन् ।
गण्डकी प्रदेश सभामा बहालवाला ५९ जना सांसद र ८५ वटा स्थानीय तहका प्रमुख र उपप्रमुख मतदाता छन् । एक जना प्रदेश सांसदको मतभार ५३ छ भने स्थानीय तहका प्रमुख र उपप्रमुखको मतभार १९ छ ।
गण्डकीमा कांग्रेसका सांसद २७ जना छन् । उनीरुको मतभार १ हजार ४३१ छ । कांग्रेसका स्थानीय तह प्रमुख र उपप्रमुख गरी ६६ जना छन् । उनीहरुको मतभार १ हजार २५२ छ । प्रदेश सांसद र स्थानीय तह प्रमुख र उपप्रमुख गरी कांग्रेसको कुल मतभार २ हजार ६८३ पुग्छ ।
गण्डकीमा एमालेका सांसद २२ जना छन् । उनीहरुको मतभार १ हजार १६६ छ । एमालेबाट स्थानीय तहको प्रमुख र उपप्रमुखमा ७० जना छन् । जसको मतभार १ हजार ३३० छ । प्रदेश सांसद र स्थानीय तह प्रमुख तथा उपप्रुमख गरी एमालेको कुल मतभार २ हजार ४९६ छ ।
राष्ट्रिय सभा निर्वाचनका लागि गण्डकीमा कांग्रेसको सबैभन्दा धेरै मतभार छ । एमालेको भन्दा १८७ मतभार कांग्रेसको धेरै भए पनि एमालेसँग गठबन्धन गरेको छ । कांग्रेस र एमालेको कुल मतभार ५ हजार १७९ पुग्छ । जुन गण्डकी प्रदेशमा दुइतिहाई बहुमत हो ।
गण्डकीमा नेकपाका प्रदेश सांसद ७ जना र स्थानीय तह प्रमुख तथा उपप्रमुख ३० जना छन् । उनीहरुको कुल मतभार ९४१ छ । नेकपाले गण्डकीमा गोमा घिमिरे र कपिल लामालाई उम्मेदवार उठाएको छ ।
गण्डकीमा राष्ट्रिय जनमोर्चाले पनि उम्मेदार उठाएका छन् । जनमोर्चाका तर्फबाट शंकरप्रसाद बराल र लक्ष्मी बास्कोटा उम्मेदवार छन् । गण्डकी प्रदेश सभामा जनमोर्चाका तर्फबाट सांसद नरहे पनि स्थानीय तहमा ४ वटा पद जनमोर्चासँग छ । उनीहरुको कुल मतभार ७६ छ ।
गण्डकीमा राप्रपाका दुई जना प्रदेश सांसद छन् । उनीहरुको मतभार १०६ छ । यस्तै, प्रगतिशील लोकतान्त्रिक पार्टीबाट एक जना सांसद छन् । राप्रपा र प्रलोपाले राष्ट्रिय सभा सदस्यमा उम्मेदवार उठाएका छैनन् ।
-1746009348.jpg)
